曾俊華(左三)話自己係好聽話嘅病人，仲話做人唔好咁忟憎。(陳詠琳攝)
前財政司司長曾俊華2009年曾經心臟病發，最後要進行「通波仔」手術。曾俊華今日(23號)出席「世界心臟日2023健心跑暨心臟健康嘉年華」時，重提呢件往事，仲話自己係一個好聽話嘅病人喎！原來佢講緊有持續準時食藥，補品等亦都食到足，所以呢十幾年嚟身體都保持得唔錯。
曾俊華好多謝當年瑪麗醫院同十幾年嚟照顧過佢嘅醫生，依家都有繼續做運動，又話最緊要個人心態要保持得寬敞啲、唔好咁忟憎，對病情就會有好大嘅幫助，同時亦不忘呼籲市民要好好保養心臟。
林正財每周挑戰一座大山
出席同一活動嘅行政會議成員林正財，就話自己係一個好鍾意運動嘅兒科醫生，近10年都有踩單車，仲要以一星期一座大山做目標，每個禮拜最少踩單車爬升930米。佢鼓勵大家先揀一種自己鍾意、可以恆常做同埋切合自己生活習慣嘅運動，然後完成每個禮拜自訂嘅目標，相信可以保護同強化心臟。
