江玉歡重回新民黨
立法會選舉提名期展開，選舉委員會界別議員江玉歡早前宣布棄選，今日就公布重回新民黨。
江玉歡喺2014年曾經加入新民黨，喺2015年代表新民黨出戰港島東康山區區議會選舉，不過落敗。之後，江玉歡喺2021年以獨立身份當選立法會議員。江玉歡今日公布重回新民黨，解釋話睇到今次新民黨港島西同港島東區候選人陳家珮同郭浩景令佢見到傳承同希望，「我下定決心，是時候回來了，回到新民黨這個『老家』，與大家並肩作戰」。
《am730》向江玉歡查詢係咪棄選之後，獲得葉劉淑儀嘅邀請重回新民黨。江玉歡話事實上醞釀咗一段時間，之後再公布喺新民黨嘅崗位。至於未來有冇機會繼續從政，江玉歡話人生有好多可能，但暫時冇諗到咁遠，最重要做好今次選舉先，嚟緊會聯同新民黨候選人落區拉票。當新民黨議員當選之後，希望壯大立法工作。
協助新民黨來屆議員
新民黨主席葉劉淑儀發文歡迎江玉歡回歸新民黨大家庭，話江玉歡喺公布唔競逐連任之後，應承全力支持新民黨，並樂意協助新民黨一眾連任同新科議員。葉劉深信新民黨嚟緊嘅立法會議員喺黨內2名法律專家江玉歡同黎棟國協助下，一定可以將立法工作做得更好，令議會論政質素更上一層樓。
已公布參選港島東區嘅仲有民建聯植潔玲、民建聯李清霞、自由黨阮建中、工聯會吳秋北。至於公布參選港島西嘅仲有民建聯陳學鋒、自由黨楊哲安、工聯會郭偉强同獨立候選人黃秋萍。
