葉劉淑儀在東涌向街坊大派500包米
物價高漲，新民黨主席葉劉淑儀為咗幫手減輕街坊面對嘅通脹壓力，啱啱過去嘅周末向街坊派發500包白米，大受歡迎。
葉劉當日聯同新民黨立法會議員陳家珮喺東涌翔東邨，向街坊派發500包、每包5公斤嘅白米。雖然天氣炎熱，領取物資嘅街坊依然大排長龍，高峰時期有接近100人。葉劉話街坊紛紛上前交流同問候，攞到物資之後仲展現笑容。就算大家汗如雨下，葉劉覺得可以畀街坊得到日常生活物資，好值得、好有意義。
葉劉前排接受傳媒訪問曾經提到新民黨規模較細，冇咁多資源，分享曾經有其他政黨區議員喺太古城派嘉美雞，新民黨只可以喺側邊派豉油自嘲。葉劉當時仲話：「我哋邊度嚟隻嘉美雞，又唔係自由黨識咁多飲食界。」
自由黨區議員派嘉美雞
至於自由黨今年仍然有嘉美雞派，中西區區議員楊哲安喺5月15號宣布因應端午節派發嘉美雞，成功登記嘅市民可以喺6月3號去佢地區辦事處領取，以賀佳節！不過數量有限，先到先得，額滿即止。
ADVERTISEMENT
