楊潤雄同兩隻黃鴨一齊合照。(楊潤雄FB)
兩隻巨型橡皮黃鴨喺維港團聚之後，繼續吸引唔少人去「打卡」，最新包括文化體育及旅遊局局長楊潤雄！佢今日(15日)喺facebook專頁上載兩張同黃鴨嘅合照，第一張係喺海旁同兩隻黃鴨側面合照，另一張就喺政府總部入面同黃鴨「摸頭」。
楊：黃鴨「放閃」為香港帶嚟歡樂
楊潤雄提到，兩隻黃鴨喺維港「放閃」的確為香港帶嚟歡樂，又話康文署舊年開始舉辦嘅「藝術@維港」大型戶外藝術活動，其實已經示範咗點樣喺維港兩岸，為市民同旅客帶嚟嶄新藝術體驗。呢項活動預計出年會再搞，到時會同海外、本地藝術家同藝術團體合作，喺維港設置水上藝術裝置。
楊潤雄同黃鴨「摸頭」合照。(楊潤雄FB)
諗都唔使諗就答到「景色之最」
除此之外，楊潤雄話政府都不時用維港做背景嚟舉辦大型活動，包括煙花匯演、新年倒數、「幻彩詠香江」等，今年暑假嘅「樂聚維港嘉年華」亦都係以維港做背景嘅大型綜合表演活動。佢形容，維多利亞港景色獨特、日夜有唔同美態，最近有內地媒體問佢可唔可以點出一個「香港景色之最」，佢諗都唔使諗就答咗維港，形容維港「實在有著太多的可能性！」