Ray Online｜「潮州姑爺」黃偉綸：搵老公老婆 潮州人唔係唯一選擇，係上佳選擇 (陳芷晴攝)
潮屬社團總會今日舉行新春團拜，財政司司長黃偉綸作為嘉賓致辭嗰陣，提到同潮州嘅淵源。原來佢係潮州姑爺，幫手「賣廣告」話「搵老公老婆，幫小朋友搵新抱姑爺，潮州人唔係唯一選擇 ，係上佳選擇！」
黃偉綸自言唔係潮州人，但老婆係潮州人，所以有資格講潮州人勤奮拼搏，仲好團結。佢話每逢節日，外父八兄弟姊妹都會一齊出席，幾圍都擺唔晒。而展望龍年，特區政府會同社會保持聯繫 ，深信總會會支持政府工作。
潮屬社團總會主席陳振彬致辭提到，香港嘅國安風險不容低估，乘住港區國安法嘅東風，香港更加必須完成《基本法》第23條立法，強化香港國際金融商業中心地位。而潮總全力支持特區政府盡快完成立法工作，履行香港憲制責任。
監事會主席林健岳就話，相信喺政府領導下會推動香港喺新一年龍騰飛躍，而潮總會集結「潮人」力量。佢提到今年市面喜慶氣氛良好，起咗好好嘅開頭，一定要努力拼經濟謀發展，乘國家發展之勢。