垃圾徵費丨曾拍片怒斥措施　肥媽今聯同謝展寰拍片解說：你唔係找我晦氣呀？丨Ray Online

垃圾徵費8月1號實施，藝人「肥媽」(Maria Cordero)前排拍片大鬧政府只係將問題推去市民身上，製造混亂。但宜家睇嚟「肥媽」同政府「和解」喎，聯同環境及生態局局長謝展寰拍片，幫手解說措施。

短片入面，「肥媽」似乎啱啱買完餸，撞到謝展寰。咁唔好彩撞正對方，「肥媽」直接問「你唔係嚟找我晦氣呀？」謝展寰就答「點會呀，你咁好人，我嚟搵你係傾吓偈，睇你有冇咩唔清楚」。謝展寰望一望「肥媽」嘅指定垃圾袋，話其實好多嘢可以回收，咁就可以慳返一筆啦。

謝展寰介紹綠在區區回收便利店

佢哋兩個一齊去到綠在區區回收便利店，當謝展寰介紹緊嗰陣，「肥媽」好心急打斷佢，話「咪住先，我只係想知回收乜嘢，點回收法，我有咩著數」。謝展寰就介紹回收完可以儲積分換禮物，當佢想示範撳禮物嗰陣，「肥媽」又出手阻止佢，話由佢嚟揀嘢飲，之後話包維他奶特別好飲，因為唔使錢呀。

「肥媽」仲提出個私人問題，話佢養6隻狗，每日有12篤屎，呢啲屬於垃圾啦啩？謝展寰話由於衞生問題真係屬於垃圾，不過可以買個細啲嘅袋裝狗屎。「肥媽」就話咁3毫子一個細袋，畀得起嘅，呼籲大家記得要學識回收，對地球、對香港好，仲對自己有著數呀！