Ad Block Ad Block
本地
2022-08-02 13:47:06

網上熱話|將軍澳豬肉檔街坊鬧爆離譜 買30元切多20元仲擅自攪碎

分享:
網上熱話|將軍澳豬肉檔街坊鬧爆離譜  買30元切多20元仲擅自攪碎

將軍澳有豬肉檔被街坊鬧爆離譜,買30元切多20元之餘,仲擅自攪碎。(Facebook將軍澳主場圖片)

到街市買餸最怕遇不良店家。有一名將軍澳女街坊上周五於Facebook群組「將軍澳主場」上載1張豬肉檔相片,分享買豬肉中伏經過。女街坊指出,一星期前在寶琳街市豬肉檔買豬肉,「我要30元個阿姐就切左50幾元焗我要」,當時她息事寧人沒有計較。

惟上周四她再到該豬肉檔購買30元半肥瘦豬肉,阿姐竟擅自把豬肉攪碎。該名女街坊指,「當時我攞緊錢未有留意,當我畀完錢之後想攞嚿肉,佢話已經攞咗去攪碎,仲想焗我要」。今次,她企硬沒有買下被攪碎的豬肉,惟她形容「阿姐」隨即變臉,「畀晒面色我睇,求其切咗嚿瘦肉畀我」。但她心想仍可用來炒瘦肉,便「算數走咗」。

網民:呢個係慣犯

惟到晚上女街坊才知中伏,「晚餐炒咗啲肉來食先發現硬到食唔到」,並謂以後不會再到該豬肉檔買豬肉。「只怪我哋呢啲新進C9(師奶)冇經驗,以後都唔想幫襯呢間買肉」,又提醒其他街坊「要小心呢個阿姐」。

貼文一出,即引起將軍澳街坊熱議,更大爆該豬肉檔阿姐是慣犯,紛紛留言稱「呢個阿姐最鍾意亂咁收錢!」、「我前天都係,話要50蚊玻璃肉,X!一嘢斬咗$90,我話太多,佢話多小小,吃多兩件,黐X線,兩丁友,三日都吃唔晒喇」、「成日都係咁,我又係買$30畀$50,話食唔晒唔要,就扮慘話切咗了」。

Ad Block

亦有自稱曾從事切豬肉的網民直斥,該豬肉檔做法離譜,「我以前做過呢行,講真落刀無乜可能百分百準,不過切多幾蚊,客人唔會介意,條友切多廿蚊,直頭晒譜」。有網友更提議樓主及中過伏的街坊,有問題應該直接拒要或打去海關投訴。

Ad Block
請接受以下私隱政策及免責聲明,以示你同意am730內之私隱政策及免責聲明。了解更多
接受