財政預算案2024｜官員議員襯色　指以晨曦色彩迎接預算案｜Ray Online

財政司司長陳茂波早前形容財政預算案封面顏色係「晨曦色」，寓意政府對香港未來1年嘅期盼，預期今年經濟逐步改善。今日喺立法會宣讀財政預算案，除咗陳茂波，仲有其他官員同議員都悉心打扮，將「晨曦色」著上身。

男士就冇乜方法啦，陳茂波同坐喺隔離嘅林定國都係打條「晨曦色」嘅呔。而一眾女士就多啲變化，一班女議員葉劉淑儀、林琳、梁美芬等爭妍鬥麗一齊「打卡」合照，見到佢哋身上有唔同款式嘅「晨曦色」。議員葛珮帆就話係「以晨曦色彩迎接預算案」。議員簡慧敏仲有好特別嘅「晨曦色」頸巾，不過有啲議員嘅穿搭似乎唔係太符合「晨曦色」喎。官員方面，公務員事務局局長楊何蓓茵同醫務衞生局副局長李夏茵同樣畀面，著上「晨曦色」。

張宇人露出疲態

宣讀財政預算案都需要一段時間，見到陳茂波喺開場前都捽一捽眼，唔知係咪令自己醒神啲。而冇份講嘅議員慢慢都開始分心，新民黨李梓敬抬頭望望公眾席，仲有唔少議員托頭休息，自由黨張宇人仲雙手掩面。