鄧炳強與深圳大學學生拍片　被讚真人年輕保養得好｜Ray Online

成日拍片嘅保安局局長鄧炳強，前排帶住一班保安局青年領袖去深圳大學交流，對深大學生留下好好嘅印象。所以喺最新一集「小角色‧大人物」就衝出香港，同兩位深大學生傾偈。兩個女學生仲大讚鄧炳強真人後生啲，保養得好好，可能因為做紀律部隊有運動習慣喎。

鄧炳強訪問兩名深大學生

系列叫做「小角色‧大人物」，鄧炳強喺開場白輕鬆咁提到無論小角色定係大人物，嚟到呢到得一個角色，就係佢老友。今次訪問嘅兩個學生分別係就讀播音主持學系嘅余果，同埋海洋科學專業嘅黃曉琪。鄧炳強問到兩位有冇睇過佢嘅社交平台，對方話有睇過佢嘅微博同小紅書。再問到最印象深刻係邊個帖文，同學就回應係鄧炳強飲豆汁嘅帖文，覺得佢好犀利，因為佢之前試過飲，覺得好難飲呀！

當中就讀播音主持學系嘅余果，嚟緊會去中大就讀碩士，希望把握機遇，畢業後快啲投身社會，因為社會就係好好嘅大學，仲話可能可以喺香港搵工添。鄧炳強喺最後問到兩位想佢幫手做啲咩，余果問到有冇機會之後喺中大見到佢，鄧炳強話會爭取爭取，至於黃曉琪就話希望同鄧炳強合照啦！

鄧炳強形容兩位係上進有為嘅大灣區青年，大灣區嘅未來就係靠佢哋啦，相信大家會同佢一樣，非常欣賞呢兩位有諗法嘅青年人。