Ray Online｜鄧飛被海關搜查 指「假假地都係議員」
香港同內地通關之後，兩地人民往來頻繁。立法會選委界議員鄧飛喺社交網站分享，早前過關返香港，居然被內地海關人員截停搜查，係幾十年嚟第一次，話證明嗰日衣冠唔「靠譜」喎。鄧飛話心諗假假地都係個議員，屬於愛國者陣營成員，冇理由對佢唔放心呀。但最令佢哭笑不得嘅係，海關人員搜查佢嘅公事包，其實淺層就放住張議員證，偏偏海關人員睇唔到。
鄧飛形容海關「阿姨」翻箱倒櫃咁檢查佢嘅公事包，見到入面有一本小書《入關》，既然係簡體字就冇多理。跟住又見到佢嘅會議文件袋，問係咪啱啱由內地開會返嚟，再望一望文件標題就冇打開查。之後仲未完，繼續搵，都係佢嘅更換衣物，最後當然放行鄧飛。
鄧飛指想被認出時偏偏無人認出
終於返到香港之後，鄧飛話要去某個劇場處理事情，戴上口罩，非常低調。點不知一入門，一個清潔嬸嬸老遠見到就大嗌「鄧飛校長！我成日留意你開會㗎」。對於接連嘅經歷，鄧飛有感而發，話人生就係咁，唔係不如意事十常八九，而是錯配之事成日發生，想畀人認得嘅時候就冇人認得，被問「你係邊個啊？」。而唔想畀人認出，就偏偏化成灰都被認出。