圖片來源:Threads、TVB《愛回家之開心速遞》劇照
學生可以在校園飯堂食飯無疑是一種福利,一來方便,二來價錢相對便宜。不過,如果出品難食,學生日對夜對影響胃口,令學習生活添上一份無奈的悲哀。早前,有網民在香港中文大學校園內的「眾志堂」學生膳堂用膳,點選了一份餐牌照片賣相不俗的「白汁蘑菇雞扒撈公仔麵」,豈料餐點上枱後竟與餐牌圖片大相逕庭。
圖片所示飯堂餐牌的「白汁蘑菇雞扒撈公仔麵」。(圖片來源:Threads)
雞扒撈丁賣相與實物不符
從發文者上傳的照片中,可見這份「白汁蘑菇雞扒撈公仔麵」盛惠36元,平過坊間茶記。惟上枱後不但由撈公仔麵變成湯麵,所謂白汁蘑菇更變成湯麵上的幾粒蘑菇及一點微稠的醬汁。發文者指餐點上枱後曾詢問飯堂姨姨「唔係撈丁咩」,而姨姨則平淡回應指「係咁架啦」。
真實版點睇都不似撈丁,似白汁溝水!(圖片來源:Threads)
網民群起攻之:我係你就唔埋單走人
偽撈丁的賣相確實令人胃口頓失,亦因此引起網民關注。有網民誇張恥笑「嘔吐物咁款」、「我啱啱問咗我隻狗,佢話佢都唔食」、「嘩佢碗嘢咁嘅樣都好意思拎出黎」。亦有網民思疑「算唔算違反商品說明條例?」,更教路「埋單你擺底20蚊走,佢追問你答佢係咁㗎啦,我都無食過撈丁」、更笑稱倒走湯汁便是撈丁。
中大人推薦校園美食
不過中大校園內都有師生欣賞的美食,如崇基學院蘭苑的五層西多、龐萬倫學生中心Paper & Coffee的日式炸雞。小編一位友人Y小姐是中大校友,分享昔日中大名物:「以前醫學院大樓canteen的檸檬批好出名,可惜執了,現在食唔到。」










