內地中南財經政法大學大三女學生小晶，上網用十幾蚊點咗份午餐，因為上堂無法及時取餐，就叫外賣哥將食物放喺宿舍一樓長枱。落堂後，小晶趕到宿舍，發現外賣不翼而飛，佢聯繫外賣哥，對方話已按要求放喺長枱。
於是小晶貼出告示：「請12月8日偷吃我外賣的朋友，把錢轉給我。」小晶話長枱係大家攞外賣嘅公共地帶，外賣被偷已唔係第一次，佢唔意外，但覺得咁多次可能係同一個人所為，如果一直唔出聲，就等同縱容呢種行為。於是佢印告示，並附上支付寶帳戶，請偷拿外賣嘅人匯款俾佢，仲加咗行小字：「算我求你，有點良心好嗎？」佢話無期待過真係有人還錢，只係想提醒同學們多加注意，同埋希望震懾一下偷攞外賣嘅人。