不論經濟、民生抑或金融，香港由開埠至今，似乎各方面發展都受「阿爺」影響，尤其發展初期，內地政局稍變，香港便成了在後黃雀，而其中一項影響，必然是推動了製造業發展，同時衍生了一個充滿集體回憶的職位——工廠妹。在國共內戰爆發後，大批內地難民及資本家湧港，從此令本地工業有了翻天覆地的改變。促成製衣業高峰，固然是對香港影響至深，然而，當年被父權社會忽視的女性地位，亦因著工廠妹生涯而有所提升或改變，證明女子不再只是生育機器，而這段時光的辛酸與快樂，大概只有當年的工廠妹才能娓娓道來。
文：Wing 圖：蘇文傑、部分由六廠基金會提供 鳴謝：六廠基金會
只欠一個
讀書機會
約於六、七十年代入行的May姐，說話鏗鏘有力，字字擲地有聲，「我依家？依家咪係黃金單身女士囉，我今時今日都好二索(易索)㗎！」
聽過不下數十次的金句「工廠妹，二索，易索。」年過65的May姐說：「嗰時啲麻甩佬打麻雀，打二索就會大叫『工廠妹』，因為知識水平低，我仲聽過有啲男人話『唔呃你哋呃邊個』等難聽嘅說話。我十幾歲到廿幾歲期間都喺工廠打工，嗰個年代，普遍女性嘅學識水平都好低，原因係當年係男性主導社會，如果屋企淨係夠錢俾一個細路讀書，一定係供個仔讀。」她笑言自己是家中「七姐」，在七姊弟中排行第七，「我好好彩有屋企眷顧，因為阿哥、家姐當時都出晒身，我有機會讀到初中畢業，後來就去咗做文職，會計助理；嗰陣都幾威㗎，喺當時嘅於仁行(現時遮打大廈)返工，一個月有成400蚊人工。」當年居於木屋區的她，鄰居以至朋友大部分都在工廠工作，「我嗰陣聽啲喺工廠度做嘅朋友講，佢哋一個月有成600至800蚊，講緊係正常嘅8小時工作時間喎，當年差200蚊差好遠㗎啦，咁梗係搵朋友介紹我入去做啦。」
工廠妹易索？
May姐當時獲介紹到新蒲崗一家工廠工作，「當年嗰區真係好多間廠，我都唔記得自己做嗰間叫咩名啦，一層有兩間，大廠細廠都有。」她笑言「識車嘢」是當時女性的唯一技能，換句話說，即是任何女性都可以是工廠妹，「我無法否認，當時嘅工廠妹，的確因為冇書讀而見識少，甚至唔識嘢，冇其他求生技能，做工廠妹多勞多得，密密做就得㗎啦。」日車夜車，無可否認，工廠妹生活沉悶乏味，May姐笑言自己當年非常貪玩和反叛，閒時愛跟好姊妹跳舞，「Agogo、Hala Hala、Cha Cha……全部都係當年好興嘅舞步，跳舞嘅地方，人就梗係複雜啲，我嗰時有啲朋友，就係因為跳舞而俾人呃咗去做舞小姐。」
從事工廠工作十多年後，May姐於婚後的八十年代成了全職家庭主婦，但仍有相約當年工友飲茶閒聊，八卦行內動向，「八十年代時，唔少工廠北移，製衣業人力需求稍為減退，反而黃色事業開始盛行。嗰陣我同啲行家傾偈，真係聽聞有行家去做小姐，俾著係你，習慣咗高收入，突然冇咗，手停就口停，又唔識做其他嘢嗰陣，你會點揀呢？」
流水作業
流水人生
六、七十年代的香港女性，沒有多少個像May姐般強悍，她們普遍成長於父權家庭，順應命運安排，走著父母安排的人生路，同為六十年代入行的工廠妹容姐和杏姐，就是其中之一。
被同行視為老大姐的杏姐，在工廠度過了21個年頭，可說是見證製衣業興衰，「我讀到小學㗎咋，11歲就俾屋企人安排入工廠做，冇話鍾唔鍾意㗎啦，阿媽叫我做咪做囉，咁我係屋企嘅二家姐，讀書機會咪留番俾細佬妹囉。雖然當年好多女工都冇點讀過書，但其實有啲人好上進，唔少人會日頭開工，夜晚返夜校，打算畢業轉去寫字樓做文職。」杏姐說。容姐續解釋：「工廠分好多工種，淨係車工同造原子粒(編按：即電晶體，屬於電子零件)嘅女工已經好大分別，嗰時阿媽叫我千祈唔好做原子粒，群埋嗰啲都係飛女，可能因為衣著啦，一般車衣女工都打扮得好樸素，因為用衣車嗰陣會俾機油揩到件衫污糟晒，做原子粒嘅唔會嘛，可以著靚衫返工。」
快樂工作間
杏姐指，她曾經在一家工廠工作5年，「嗰間廠，以前就係細廠，依家已經係大牌子啦，專賣牛仔褲。佢哋同其他廠好唔同，會安排員工培訓，因為佢哋想班工人每項細工都識做，執線頭、車褲腳，因為行流水式作業嘛，唔夠人咪可以是但搵個人補位。(咁使唔使加班？)要㗎，老闆話加咪加囉，反正都係做幾多搵幾多，多勞多得嘅，嗰陣啲人真係好勤力㗎，邊有依家咁多公眾假期。」「但係工廠妹係一份永世唔使旨意升職嘅工作，好多女人都要搵錢養家，最緊要搵得多同搵得快。」容姐說。
當年到工廠工作，有人感覺沉悶，亦有人樂在其中，「開工點會悶啫？以前啲車位好近，個個都熟手㗎啦，邊車邊傾偈都唔知幾開心，有啲唔搭嘴嘅，齋聽人講奶奶是非都夠過癮啦。公餘都唔會悶㗎，除咗讀夜校，仲有人走去上堂學嘢，化妝、時裝設計……咩都有。」容姐跟杏姐一樣，才八、九歲便到工廠工作，不同是，她在那個滿是衣車聲的地方，認識了現任丈夫，「我當年喺細廠度做，我老公唔係車工嚟嘅……佢啊，老老實實唔撩女仔㗎。」
總結
生於同一年代，同一地方，從事同一份工作，命運、個性卻默默引導著將來。在工廠工盛行年代，幾乎家家戶戶都有個工廠妹，今時今日，有人自由自在，冇「夫」一身輕，亦有人有兒有女有丈夫，家庭幸福美滿；縱然人生路不盡相同，但當她們再次聚首，你一言我一語之間，仍滲透著「以工廠妹為傲」的團結精神，或者，這就是獅子山精神的另一面貌。
About六廠基金會
成立於2015年的非牟利機構「六廠基金會」，是南豐紗廠保育項目其中一部分，致力保育香港紡織藝術及文化，目的為當年的六廠構建永久館藏，並策劃一系列展覽及社區活動，不時邀請當年的工廠工人分享經歷，傳承紡織產業的珍貴故事。
網站：http://www.themills.com.hk/zh/mill6-foundation
