網上熱話｜港人飲茶童年回憶 兒童快報引網民共鳴：細個一定買！
講起童年的集體回憶，大家可能記得一首首的兒歌，又或者大量小食部的零食，甚至公園的滑梯與鞦韆。早前，有網民在社交平台分享細個與家人飲茶必做的事，引來極多留言表示「一模一樣」，未知你又有冇相同回憶呢？
圖片來源：ViuTV《反起跑線聯盟》劇照
港人分享飲茶童年回憶
對小朋友嚟講，要乖乖地坐幾個鐘絕對不是一件容易的事，相信不少人都記得細個與家人飲茶時，好想返屋企打機、睇電視的心情。早前，有網就在社交平台上發文，直指自己「細細個跟屋企人去飲茶」時，「一定會去附近報紙檔買本兒童快報，入面勁多有獎遊戲」。
圖片來源：Threads
網民留言勁有共鳴
發文者的經歷加上幾張《兒童快報》的封面和內頁配圖，成功引來大批網民紛紛表示好有共鳴，有網民大讚「你set 個scene set得好好，真係唔知點解酒樓隔離就係報紙檔」、「以前會入去睇啲遊戲攻略，但明明自己冇玩嗰啲game」，又有人笑稱「因為佢所以我學識寄信」、「我投過稿寫過信都畫過畫，全部都有登」、「嗰陣唔知點解個個都好鍾意寫信畀編輯部，然後問佢哋自己啲字值幾多分」。
已成過去倍感唏噓
雖然與家人飲茶睇兒童快報是眾多港人的集體回憶，但隨著電子產品成為主流工具，會睇紙媒的人已愈來愈少，而兒童快報亦已於2021年正式停刊。而在網民留言中，伴隨快報離開的還有他們的親人，有人眼濕濕留言指「我阿嫲每星期都買俾我睇」、「哇，呢本兒童快報我細細個都好鍾意睇架，細個我爸爸成日買俾我睇，仲試過幾次玩遊戲得獎，可惜我爸爸而家唔喺度了，見到回憶返晒黎，好掛住佢」。
ADVERTISEMENT
