網上熱話｜西九華服嘉年華 巨型仙子花燈被指似「紙紮公仔」網民：好有七月十四feel
國慶將至，西九文化區舉行限定4日的「迎國慶 ‧ 華服嘉年華」，重頭戲是高達12.8米的主燈「紫霞仙子」，由於主燈甚為巨大，加上可以眨眼及郁動，如此靈動即時嚇親不少網民，更有人形容裝置甚有「詭異感」。
西九舉行「迎國慶 ‧ 華服嘉年華」，不過巨型主燈「紫霞仙子」被指似「紙紮公仔」。（圖片來源：官方圖片）
「迎國慶 ‧ 華服嘉年華」由紫荊文化集團、香港中旅集團、民建聯、香港文化藝術界國慶籌委會合辦，由即日起至10月2日舉行，免費入場，嘉年華主打「白天遊園」及「夜間賞燈」的日夜不同遊玩概念，當中最大亮點是由4個大型花燈組成的「香江仙子」主題巨型花燈，其中主燈「紫霞仙子」更高達12.8米，是目前香港展出的最大單體人物花燈。
真．紫霞仙子朱茵任亮燈嘉賓
活動亮燈當日，大會特意請來在《西遊記之月光寶盒》飾演紫霞仙子的朱茵擔任嘉賓，有傳媒直接問朱茵：「你覺得自己靚啲定佢（花燈）靚啲？」朱茵即時迴避笑稱：「唔好玩啦！」
大會請來真．紫霞仙子的朱茵擔任嘉賓（圖片來源：官方圖片）
識得單眼撥扇
「紫霞仙子」花燈化上濃妝，被指貌似「紙紮公仔」，更懂得單眼及撥扇，加上現場光影效果，在晚上看來尤其不安。花燈照片在網上瘋傳後，引來不少負評，「整人形既"花燈"本身已經好易令人feel到其他野，周圍既設計又配合唔到，變成華服版進擊之巨人咁。」、「好有七月十四 feel」、「究竟係鬼節定係中秋節 我唔係話朱茵」、「好驚嚇下= =我都係鍾意簡簡單單放下燈籠，picnic下，放下蠟燭咁就OK了，睇黎又少個地方了」，更有人貼出韓劇《魷魚遊戲》的巨型「英熙娃娃」，問「有無遊戲玩？」。
ADVERTISEMENT
