有說「眼淚是女性的最強武器」，柔弱攻勢令對方望而心軟，不論是面對責難抑或互相爭執，一滴眼淚即可以扭轉局勢。但若場景換在辦公室，眼淚能否成為職場武器呢？還是只是一個暴露情緒弱點的計時炸彈？人事顧問提醒，職場並非情場，不好好控制個人情緒，隨時會「淚人終累己」。
職場不如意事常有，有人會強忍面對，也有不少人曾經歷情緒決堤，淚灑辦公室。有從事服務業的社會新鮮人在網上分享，指公司人手不足，加上不斷被上司責怪做錯事，就在一次躲進洗手間哭時，被同事發現，結果同事們輪流慰問，「而家俾人覺得我好脆弱，究竟同事會唔會喺背後笑我？」另有網民則抱怨，「有同事一俾人鬧就喊一粒鐘，要全公司人照顧佢，根本博同情！」有網民提出「男女有別」，「女同事可以喊，男人喊抵再俾人鬧。」也有人認為，「喊係正常宣洩，鬱埋好易情緒病。」
安俊人力資源顧問董事總經理周綺萍認為，打工仔最好避免淚灑職場，「喊係可以，咪匿喺廁所、唔好俾人見到囉。俾上司睇到，就會覺得係軟弱表現，會諗『對住個客點算？』同事見到，會認為同弱者一組唔著數，甚至會認為係手段，令上司特別鬆手………一次半次無所謂，但可免則免啦。」她又稱，「男女有別的確係現實，女性少少眼淚，好多人會包容；但男性被視為『強者』，對男性喊嘅包容程度低好多，更加會俾人覺得係細路。」
老闆應控制身體語言
至於眼淚會否成為被員工利用的「工具」，繼而影響公司運作，身兼立法會議員的縱橫二千集團創辦人及主席田北辰認為，老闆應顧及個別員工特性，但對員工的職責應一視同仁，「明白有啲人係『水晶製品』，郁下就有情緒，但老闆唔可以厚此薄彼，喺工作上特別遷就佢，咁對其他同事好唔公道。譬如開集體會嗰陣，有人有情緒，可以散會之後，先拉佢去一邊處理佢嘅問題，唔好影響在場同事。」他又補充，老闆和同事間的溝通是雙向，老闆應控制身體語言，避免發生不愉快情況。
與其落淚 不如申辯
周綺萍指出，控制情緒也是工作能力的表現，「喊會俾同事或上司覺得你控制唔好自己情緒，鬧人都係宣洩情緒，咁會唔會用鬧人嚟發洩？」她建議有情緒時，可考慮解釋立場，「喊係無解決過問題；如果將自己睇法講出嚟、解釋自己覺得委屈之處，都對自己公平啲。」她續指，除了解釋立場，有時短暫行開工作場景，或視乎情況承認錯誤，都比淚灑人前好。