2025-06-05 10:40:00

NBA總決賽｜雷霆溜馬周五開戰　勢變現代奪冠藍圖典範

NBA總決賽在周五（6日）早上展開，由奧克拉荷馬城雷霆與印第安納溜馬爭冠軍。由於兩支球隊都從未贏過總冠軍，因此勢必出現一支新總冠軍。

今屆季後賽，有一個事實愈來愈清晰，就是場上若有一個球員唔識投籃又防守一般，佢就會被針對，而你支球隊好可能會被淘汰。而且單是「企定定射3分兼識防守」的3D球員已經唔足夠，現代籃球要求場上每個人最好都識控波、識快速決策。

呢個正正係波士頓塞爾特人去年奪冠嘅原因。當然，佢哋有達譚（Jayson Tatum）同謝倫布朗（Jaylen Brown）兩大球星，但身邊圍住佢哋嘅球員，例如戴歷韋特（Derrick White）、賀列迪（Jrue Holiday）同賀福特（Al Horford），全部都識投籃、識傳波、防守唔會拖後腿，就算用替補陣容，都唔見得有明顯弱點。

今年，呢款勝利藍圖由雷霆同溜馬繼續演繹，攜手闖入總決賽。

雷霆方面，「SGA」基爾謝奧斯阿歷山大（Shai Gilgeous-Alexander）謝倫威廉士（Jalen Williams），再加多一人如多特（Lu Dort）、卡魯素（Alex Caruso）或卡臣華萊士（Cason Wallace）幾乎一齊打了88%的季後賽時間。當中有176分鐘係4人同場，而雷霆每個回合淨勝18.1分。每個人都識防守、識決策、識製造進攻。

雷霆進攻系統多變

SGA係進攻核心，但雷霆最大優勢係冇一個人會拖慢系統，多特識cut入、華萊士連接攻勢、卡路素即時判斷。冇人係「控波黑洞」、冇人係唔識控波的射手、冇人係防守漏洞。連雷霆嘅內線都符合要求，賀姆根（Chet Holmgren）識射、識傳、識運；赫頓史丹（Isaiah Hartenstein）唔射3分，但終結同組織方面非常有感覺。

溜馬亦如出一轍，夏利貝頓（Tyrese Haliburton）是進攻引擎，其餘人如南赫特（Andrew Nembhard）、艾朗尼史密夫（Aaron Nesmith）、施安簡（Pascal Siakam）及米利斯端納（Myles Turner）都具備高節奏、準確傳導同強大能量。而且全部準繩。4人季後賽3分命中率都超過4成，每場出手3次以上。