
吳卓羲/郭晉安/歐陽震華直播跳《晚安大小姐》 網民感嘆︰虐待中老年人
人人都話藝人北上掘金好搵,實情係點?早排幾位前TVB男藝人吳卓羲、郭晉安、歐陽震華、王浩信埋高鈞賢,一齊參與內地網上直播節目,其中一個環節係5位男星跳舞,仲係跳hit過好一陣子嘅《晚安大小姐》 。

吳卓羲郭晉安歐陽震華等人內地直播跳《晚安大小姐》
各人舞步唔齊唔知跳乜十分尷尬
5位男星當中3位係視帝,但係跳舞……似乎只有dancer出身嘅吳卓羲比較有板有眼,其餘各人舞步唔齊甚至根本唔知跳乜,成個畫面都有濃濃嘅尷尬感。尤其係目光呆滯嘅郭晉安、近乎跟唔到嘅歐陽震華……
喺另一條片,同一造型嘅吳卓羲同王浩信相信喺同一個節目度一對一跳舞battle,以爭取網民投票支持。呢個環節簡直開正吳卓羲嗰瓣,solo跳舞無難度,反觀王浩信就真係得個企字。
做得突兀,觀眾都唔太好受,有人在5名男星跳舞條片度留言,直指安排係「虐待中老年人」、「何事落得這下場」。當中最後生為高鈞賢都41歲,歐陽震華更加係64歲……亦有人見到吳卓羲同王浩信跳舞就話「看著小時候的男神這樣做直播很心酸」。
原文刊登於 Yahoo 娛樂圈