盧海鵬早前接受好友苑瓊丹訪問，亮相香港開電視節目《開工大吉77》，鵬哥笑言「睇住苑仔大」，喜見對方演技有進步：「我對住啲蠢嘅對手會扯火鬧人，我理得你喊唔喊，總之做戲唔好怕場面，但係女仔我好少鬧嘅，唯有唔出聲囉！」
鵬哥指，從小對演戲充滿興趣，更三次投考無綫藝員訓練班，「27歲廣州落到嚟香港，諗住考訓練班，點知我超齡！到第二年又去試，又係唔收我，第三年都冇晒心機，偏偏有個朋友話我知，呢年收生收到35歲，當時我人工都成800蚊一個月，但成世人鍾意做戲，都係去考多次，最終同周潤發、吳孟達呢班人做同學。當時簽約得500蚊一個月，畢業仲要自己整件『單吊西』，我係靠4,000蚊積蓄捱到畢業。」
入行後鵬哥靠積蓄過活，笑言曾要行路返工，更會把握每個演出機會：「當年做特約5蚊一集，我咪舉手做囉，因為我個樣惡，專搵呢啲角色比我做，做得嚟又辛苦又難記，我咪試吓做喜劇演員，大家覺得幾好，咁就轉咗型喇。」鵬哥笑指自己「半退休」，坦言有工開會再度復出：「梗係想做啦，但依家都冇嘢做，唯有退休啦！」