陳卓賢大病初癒，他表示一度擔心今日會繼續失聲。
MIRROR陳卓賢(Ian)與吳家忻(Kayan9896)今日(13日)到尖沙咀出席活動，鼻音頗重的他表示自己病住過生日，並透露今日出席前一晚仍然未能開聲。他說︰「我睇醫生，佢話係上呼吸道感染，引致咽喉炎，依家好好多。佢有問係咪唔夠休息，我就話可以多啲。醫生就叫我休息多啲，同食多啲維他命。」
Ian稱休息期間仍不忘創作，更因而搞到睡得不好。他預告6、7月會推出新歌，但今次就有別過往只挑選一隻合心水的demo去製作，而是同一時間製作幾隻不同的demo。他說︰「近排三心兩意選擇困難好嚴重，就幾隻demo一齊做，出嚟再睇下邊隻先。」
想買樓俾媽咪
Ian表示因為生日在生病中度過，稍後會跟家人補祝，順道慶祝媽媽生日及父親節。問到會買甚麼禮物送給家人，他笑言囝囝向來偏心媽咪，所以買給媽媽的禮物比較難諗，相反買給爸爸比較容易。Ian稱雖然媽咪會叫他不要買禮物，留點錢給自己用，但他仍會折現，「折現之餘都要加禮物先得，因為有儀式感先開心。爸爸就未必折現，媽咪就戴得上身嘅珠寶都買過，要再諗諗。(送磚頭？)太重啦，帶唔到出街。哈哈！」他續表示如果有多些工作機會，大家多些支持，他便可以很快買到磚頭給媽咪。問到距離目標近不近，他稱仍有距離，要努力再奮鬥。
Ian媽擔心囝囝冇錢使
Ian表示，媽咪常常很擔心他不夠錢用︰「佢成日都怕我使錢，可能佢以前知我真係冇咩錢傍身，就好擔心。直至早一、兩年，可以照顧到自己多啲，有次做嘢搭車去做嘢，買咗個漢堡食，都唔平要成一百蚊，之後媽咪問我有冇食嘢，我影俾佢睇，佢就話『你食包咋，阿仔？你係咪唔夠錢呀？我使唔使俾錢你食飯？』真係養兒100歲，長憂99，要再努力啲，等佢唔好咁擔心。」問到是否很大使搞到無錢，他指自己不是大使，收入大多用作家庭開支，如早前幫婆婆家中裝修，因此媽媽有感他已花了不少錢，所以很抗拒收下他買的禮物。
冇眼紅隊友追球星
問到今年生日收到甚麼禮物，Ian表示身邊是男仔朋友居多，大家很少互相送禮，一句祝福已很足夠，自己也很滿足。他又自爆患病期間，媽咪沒有特別擔心他，只是說一句「話咗你，冇我照顧係差啲。」他稱可能是孻仔，媽咪比較掛心。他稱生日當天原定要出席活動，但奈何很不舒服，就算打籃球都冇力，無謂獻醜。他說雖然有點可惜，但也沒有特別妒忌隊友可以跟NBA球星見面。
被AK笑圓過把風扇
提到Ian生日貼出童年肥仔照，他指應該是攝於小五、六年級，「我肥肥白白都係得嗰兩年，亦係最多相，可能媽咪鍾意，因為得意，佢依家都成日話我瘦，叫我食多啲嘢。」提到尹光向他送上祝福，Ian表示很開心，並再次強調不是AI尹光，因為有朋友認識尹光，於是托他送上祝福。他稱聽過AI尹光作品，大感厲害，自己也一度以為是尹光真人唱。他覺得自己需要更花心機做音樂，「AI好犀利係copy到聲線，但我哋有創作靈魂，AI係copy唔到，所以呢排都努力創作。」問到可會跟尹光合作，他表示期待，但自言未能駕馭到尹光的作品。
問到頭號Hellosss的AK指他小時候面圓過風扇，Ian說︰「佢唔講我都唔覺，佢真係睇得好仔細。佢真係有心，佢成日都想draw我attention，大家唔好俾到位佢入，佢睇到個訪問又好開心㗎啦！佢呢排都有keep住message我傾音樂，但佢冇關心我，但一切在心中。」
