曾俊華話好欣賞《九龍城寨之圍城》。(曾俊華FB)
近期港產動作片《九龍城寨之圍城》在坊間引起熱話，吸引唔少觀眾入場一睹城寨風采，連前財政司長曾俊華都唔例外。佢話上星期睇咗《九龍城寨之圍城》同《從今以後》，覺得兩套都相當好睇，值得大家支持。
曾俊華提到，電影故事令佢印象最深刻係講到城寨雖然係個三不管地帶。佢憶述，喺八十年代初，由美國回流返香港之後，佢同家人住喺九龍城嘅碧華花園，好近九龍城寨，所以成日都會經過嗰度。不過當時作為一個政府官員，真係冇試過走入城寨，呢個被視為龍蛇混雜嘅地方。雖然係咁，但佢話九龍城寨佢哋呢幾代人嘅一個集體回憶。
曾俊華亦睇咗另一套以女同性為主題嘅《從今以後》，佢話，自己個人對同性戀問題好中性，身邊家人朋友，亦有同性戀者，覺得呢啲都係佢哋嘅選擇同自由，旁人何必多置喙？佢話，喺華人社會，對同性戀嘅接受程度已經有所提高，但係未至於普遍可寬容接受。不過大家要面對嘅現實係，同性戀存在已久，新一代亦愈嚟愈接受，「社會係咪都要與時並進，開放一啲，去接受呢種關係」，甚至考慮比同性伴侶，都可以適當咁受到法律保障呢？佢認為呢個都係一個包容社會，應該探討嘅問題。