全體立法會議員7月將到北京參加國家事務研修考察。(資料圖片／周令知攝)
立法會議員下個月19至25號會去北京參加國家事務研修考察，據議員透露，到時或者需要配戴統一款式嘅領呔，女議員就需要戴絲巾，有議員形容係微管理。
有議員向《am730》表示暫時未收到行程，但已知嘅係立法會行政管理委員會已經通過訂製統一款式嘅領呔，男議員到時上京或者要佩戴。有議員形容好似返學被要求打「校呔」，覺得呢啲規矩係微管理。據了解，正喺北京出席全國人大常委會嘅立法會主席李慧琼，喺議員通訊群組澄清，話冇要求大家統一佩戴領呔或者絲巾訪京。據悉李慧琼仲呼籲議員共同致力維護立法會形象，佢強調一直好重視溝通，議員如果對議會工作有意見，可以直接同佢反映。
何敬康力撐設計精美
立法會行管會委員何敬康補充，事緣立法會嚟緊會推出新一批紀念品，包括領呔、徽章等等。佢強調領呔設計經過精挑細選，以藍色做底色，佈滿「立」字暗花。佢話行管會上只係建議一眾議員上京可以一齊佩戴新呔做示範，吸引公眾購買紀念品。佢個人覺得新呔非常易襯，佢日常都會佩戴。
ADVERTISEMENT
【👇送小米智能家品新品👇】
