立法會議員邱達根反諷曾俊華是「天才級智障師兄」
萬聖節啱啱過去，前財政司司長曾俊華不滿當局喺中環實施「天才級人流管制設計」。不過，立法會議員邱達根反諷曾俊華係「天才級智障師兄」。
曾俊華上星期五約咗朋友喺中環威靈頓街飲嘢，但形容喺「天才級嘅人流管制設計下」，佢循中環指定單行線，幾乎行到去灣仔，再兜番轉頭到目的地，足足用咗大半個鐘。
至於作為喇沙書院師弟嘅立法會議員邱達根喺私人帳戶發文反駁，劈頭就話：「致敬天才級智障師兄！」佢力數曾俊華當年擔任財政司司長，每當科創界有訴求，例必無視，話科技佔香港GDP唔夠1%。「然後退任後又走嚟做創科代言人，乜薯片蝦片扮晒創業代言人。」
籲曾俊華閒時去看電影飲咖啡
睇嚟邱達根好嬲，仲寫話：「師兄除咗教曉我9秒9變臉之外，又傳授大家失憶大法，當年蘭桂芳慘劇拋諸腦外，最緊要佢老哥要在節日高峯時，到老蘭飲後，半小時隨時離場。IQ200的師兄又教曉我對各樣事情都可以指指點點，齋噏當秘笈。」佢反問曾俊華當年做司長點解唔解決呢啲問題？形容對方「在位時不作為，退任後指指點點」佢又叫曾俊華都係得閒睇吓法國電影、飲吓咖啡算吧啦！
