圖片來源：Threads、AI示意圖
食客外賣魚生飯配1樽咳藥水
自從疫情開始大家習慣在外賣平台柯打食物，大部份食肆基本上已經有完整外賣配套，所用的外賣餐具基本都可以保溫及足夠穩陣。不過，近日有食客外賣日式魚生飯時，就驚見隨餐附送一樽裝有三分之一的「咳藥水」。原本嚇一跳，但打開嗅一嗅後就得啖笑，其實藥水樽內裝著的是日本豉油。
藥水樽裝豉油夠創意
平時外賣日式料理的話，多數會配上細細包獨立包裝的豉油和芥末，惟這間餐廳就夠晒創意，雖然芥末同樣裝在小膠杯中，但壽司豉油就盛載於藥水樽內，加上豉油顏色與傳統的黑色咳藥水顏色相似，驟眼睇的確以為是感冒咳嗽睇醫生所開的咳藥水。
圖片來源：MBC《擺飯桌的男人》劇照
網民爆笑留言
創意裝豉油方法引起大批網民討論，有網民笑稱「有冇問佢攞張醫生紙呀」、「一日三次，每次一格」、「用餐時服」。有網民就將重點放在藥水樽的成本上，直指一個藥水膠樽大約港幣2元，大讚店家「好揼本」、「日本有魚形豉油，香港終於都有自己既特色啦」，更因此令大批網民發現新大陸，紛紛表示原來可以購買藥水樽裝日常用品，「做gym裝洗頭水ok wor」。
