家維邨家榮樓一張通告近日喺網上引起迴響。(Threads用戶「justin_0926_」圖片)
房協轄下嘅紅磡家維邨，日前有一則呼籲家榮樓住客保持環境安靜嘅通告，由於大廈嘅英文名「Ka Wing Lau」同唔少香港人撞名，因此喺社交平台引起好大迴響。房協今日再發出一則「特別通告」，話要尋找香港地嘅「Lau Ka Wing」喎！
今次唔係罰Lau Ka Wing安靜
房協喺社交平台發出「特別通告」，話唔講唔知香港地咁多人叫「Lau Ka Wing」，為咗答謝大家對家維邨家榮樓嘅關注，以及辛苦咁多位Lau Ka Wing成為咗網絡紅人，決定向佢哋送上小小心意。只要法定名稱係Lau Ka Wing嘅人，不論中英文寫法係點同幾多歲，即日起至下禮拜一大除夕嘅中午12點前，喺辦公時間內去到房協銅鑼灣企業辦事處，核對身份之後就可以獲得一份利是封套裝喇。
房協話，今次唔係罰咁多位Lau Ka Wing安靜，「係獎你紅運當頭！」房協企業辦事處位於銅鑼灣告士打道280號世界貿易中心28樓，辦公時間係禮拜一至五嘅朝早8點半至中午12點、下晝2點至5點半，房協提醒咁多位Lau Ka Wing要準備有效嘅身份證明文件，又預祝大家農曆新年龍馬精神。
ADVERTISEMENT
激送Monchhichi維港海陸嘉年華入場券！
