Ray Online｜曾俊華遇普通話網約車司機不懂老牌屋苑　議員：屋苑有幾十年歷史唔代表人人聽過

網約車服務愈趨盛行，不過前財政司司長曾俊華近日分享，遇到唔識講廣東話嘅網約車司機，亦好似直頭冇聽過香港幾十年嘅老牌屋苑，質疑係咪適合照樣接單。民建聯立法會議員植潔鈴就話香港有咁多屋苑，一個屋苑有幾十年歷史都唔代表人人聽過。

植潔鈴主動喺社交平台回應事件，佢話前財爺近日分享嘅經歷，其實帶出幾值得思考嘅問題，就係網約車愈嚟愈普及，應該用咩標準衡量服務質素。對於曾俊華話司機唔識路，要全程跟住GPS導航。植潔鈴話司機未聽過某個屋苑名，未必等於唔熟香港道路。而且網約車用GPS同即時路況導航，本來就係服務模式一部分。但佢指出遇到塞車、封路、導航失準等等，司機仍要有基本判斷同應變能力，安全駕駛始終係首要條件。