羅淑佩(中)和龐建胎(右)公開以往在海洋公園的照片。(吳康琦攝)
海洋公園明年1月迎來開幕50周年，園方今日(13日)宣布一系列慶祝活動，其中便有「自然動人回憶賞」活動，徵集市民舊照片、文字與錄音等珍貴回憶，作為宣傳短片藍本；而在介紹活動期間，作為嘉賓出席活動的文化體育及旅遊局局長羅淑佩便公開了一張與父親在的海洋公園合照，分享了一段溫馨又有趣的親情故事。
羅淑佩笑住話，呢張相係2012年影嘅，當時阿爸已經80歲。嗰日天氣好熱，但佢仍然主動問阿爸，「想唔想去海洋公園玩呀？」阿爸二話不說就應承。去到之後，老人家最開心竟然係一路坐住纜車由山下去到山上，「阿爸全程笑到合唔埋口」。玩完之後，當然少唔了影張「遊客必影相」留念。而家阿爸已經不在，呢張相就變成咗最珍貴嘅回憶。
參加常識問答比賽錯過學校旅行
除咗呢張相，羅淑佩仲提到另一段童年回憶，讀書時期學校旅行去海洋公園，佢同幾位同學因為要參加常識問答比賽，結果錯過咗大部隊。後來老師好心，另外再帶佢哋幾個去補玩，大家一齊跳彈床跳到好開心，呢段「補課式」嘅樂園之旅，到而家仍然記得清清楚楚。
羅淑佩話，海洋公園對好多香港人嚟講，從來唔係純粹景點，而係陪伴成長嘅「好朋友」，承載住一代又一代嘅珍貴回憶。
ADVERTISEMENT
