何沅蔚向數碼港公司反映意見後，曾實地視察跟進情況。(何沅蔚FB圖片)
鋼綫灣數碼港海濱公園一向係市民休憩好去處，不時都有人到場釣魚。南區委任區議員、新民黨何沅蔚日前收到數碼港附近居民反映，有人喺海邊釣魚同食煙。佢聯絡數碼港公司之後，話物業管理團隊已增加「請勿垂釣」告示牌至20塊，亦會每日加強巡邏。不過，跟進個案帖文就惹來網民不滿，有人批評佢與民為敵，質疑點解要禁止市民喺嗰度唔影響人嘅情況下釣魚。何沅蔚事隔幾日發帖致歉，承認內容表述唔夠清晰，又澄清佢未介入之前，現場已經有禁止釣魚嘅告示。
出帖幾日吸引230則留言
事緣上禮拜五，何沅蔚喺社交平台話議員辦事處接獲居民求助，反映有人喺數碼港公園海邊位置釣魚同食煙，佢了解後聯絡數碼港公司跟進，相關物業管理團隊隨後將現場嘅紙製「請勿垂釣」告示牌，改為不銹鋼告示，仲增加到20塊，同時每日派員加密巡邏，提醒市民遵守守則。何沅蔚更提到同貼相，話已經再度實地視察，確保情況得以改善。
不過，帖文出咗幾日就吸引到230則留言，大部分都係湧入批評。有網民話嗰頭一向都係釣友勝地，質疑點解要禁止市民釣魚，「與民為敵！？呢d(啲)地方比人釣魚有咩問題」、「釣魚係一個健康活動，又唔係影響到人，點解妳要禁止人去享受呢」、「在一個咁廣闊嘅海邊你話唔俾釣魚？」有人就提出釣友唔一定食煙，食煙嘅亦唔一定釣魚，「一刀切唔准釣魚即是懶政，公共地方來嫁(㗎)」，又有人建議整個釣魚專區平衡各方意見。
解釋接反映後認為憂慮合理
何沅蔚事隔5日，禮拜三就數碼港公園個案跟進一帖作補充，承認內容表述未盡清晰，引起公眾關注同誤解，「本人誠心致歉。」佢進一步解釋，收到市民關注數碼港公園海邊範圍嘅使用同衞生情況之後，認為街坊憂慮合理，作為地區議員隨後著手了解。佢向數碼港公司查詢後，知道公園範圍一向貼有「請勿垂釣」告示，澄清介入之前規定已經存在，又已要求數碼港公司提供資料，希望釋除各方疑慮。何沅蔚話，充分理解釣魚愛好者對海邊垂釣嘅熱愛，亦明白公園海旁係難得嘅休閒空間，希望透過持續溝通，喺唔同人嘅需要之間尋求合理平衡。
ADVERTISEMENT
