iBond吸引投機性買入。(資料圖片)
財政預算案一公布，全香港市民見到近年最大的政治龍門飄移和集體轉軚。好像葉劉、民主黨、公民黨都由支持退稅，改成支持派錢，理由係：「既然咁差，不如派錢好過」。算，風吹向邊就跟邊轉，本來就是政客本色，最慘是親泛民的學者都跟住轉軚，但又無論述支持，咪搬其他學者的觀點左抄右抄，食相何其難堪。
退稅和派錢，本來就是分餅仔問題，即係分比中產還是分比草根的問題。退稅派觀點日新月異，其中一個論調係：如果好似澳門年年派錢，咁會形成剛性和慣性預期，到時想唔派都唔得啦？喂！大佬，同一個論調放在退稅度都一樣喎，難道退稅就不會形成剛性和慣性預期嗎？都唔好講退稅定派錢之爭，大家係唔係失憶唔記得iBond了？iBond夠差不多年年派啦，今年夠無派啦，市民暴動未啊？
庫房水浸，唔派iBond，改成爭論退稅定派錢，本是合理之事，有錢仲使咩發債喎，而iBond的本質就是債。尤其是香港財金官員，上至陳茂波，下至劉怡翔、陳德霖，甚或半官僚的港交所(388)嘅李小加，都苦口婆心強調依家係加息周期，小心資產泡沫之類。政府都係知行合一，加息周期玩債券有幾智障，問一問大一的經濟系學生吧。
iBond有一些含意是值得參考，雖然iBond的本質係債，但實際上係向中產派錢。因為iBond是由政府做莊，大家都係投機性買入，然後第一日搵位沽出，每手微賺幾百蚊。只是這種派錢方式，初期是向中產傾斜，因為iBond每一手都係一萬蚊成本，認購人太多，所以抽中iBond係有博彩投機成分。
制度改變人類選擇，後來證券行為了吸人開戶，iBond的傾斜中產本質開始改變，因為證券行會提供孖展認購，所以申請人連一萬蚊成本都唔使出，就可以投機博彩式中獎。iBond去到後期，是連經濟能力相對中產較弱的大學生、公公婆婆都可以入場，由傾斜中產改成全民博彩式派錢，一萬蚊的成本形同虛設。
結果點？結果當政府發現這種派錢無法針對性惠及中產，而是人人有份後，就馬上停掉再發iBond了，當然，你可以話我誅心論、陰謀論、事有湊巧等，演繹方法見仁見智。不過，我偏向相信政府想取中產民意，多過草根，因為這是建制分工，草根民意向來就由建制政黨的蛇齋餅粽支持，中產則由政府去爭取。
政府唔想派錢，保駕護航的不是建制派，而是民主派。派錢、退稅不是中央眼中的大是大非，建制派乘機爭取良好印象，也無可厚非。何況香港人最善忘，八萬五無講，就唔存在了。民主派最鍾意講的全民退保呢？又不提了嗎？看來，又不存在了。