妒火線
娛樂圈真心是個火藥庫，一點即著，上星期先爆完ERROR的193(郭嘉駿)和知名連登仔的攻防戰，今個星期就輪到獨立Hip-Hop歌手ProdiG向Tyson Yoshi(程浚彥)開火，食花生食到牙骹軟。
這位ProdiG日前就rap了一條片數落Tyson Yoshi，直斥對方是「跟風狗」、「蛇鼠一窩得個樣」、「冇乜家教，學吓禮儀先」，極具挑釁性。之後他更補飛話自己佢幫Tyson寫人生第一首廣東歌，但最後對方「為自己利益」出solo版本，又話對方作古仔稱首歌是為癌病病童而寫，存心欺騙粉絲，最後仲話對方利用自己身份向PR施壓，令其他藝人冇job接。
Tyson未有即時回應，隔了一陣才在IG限動列出三點聲明：一，他有搵ProdiG幫手寫《Growing Up》中的第二段，但效果未如其理想，最後決定親自落手完成；二，寫給病童的其實是另一首《If I Die Tonight》，自己亦從來不會拎人命開玩笑；三，他沒有權力控制PR選用哪一位藝人，自己出活動是求財不是求氣。
未等Tyson貼出自己在醫院病房與病童的合照，其實風向都已經好清晰，網民差不多一面倒力撐他，鬧ProdiG「你又幾有家教」、「呢啲咪叫唔抵得人紅囉」。到歌手Byejack(徐浩生)補多一刀，貼出之前自己被ProdiG DM鬧「垃圾」兼瘋狂打電話的截圖，整件事就更加一清二楚：不是爆大鑊或者揭黑幕，而是純粹睇人唔順眼。
這裡無意妖魔化ProdiG，他在地下圈子耕耘了好幾年，有粉絲，有作品，實力不俗。正所謂空穴來風未必無因，今次事件入面講到的不平，或多或少都有一定根據，亦可能背後真的有發生過不為人知的鬧劇。但他講出來的方式、語氣、時機，以及將彈藥儲埋一次過發射的爆炸感，實在好難不懷疑，他想拎的是公道還是關注。
Tyson Yoshi一向不是甚麼好脾氣之人，他也鬧過人，與其他人駁過火，但今次明明指控如此嚴重，他反而選擇點到即止，可能不是因為修為提高，而是因為他知道，呢啲東西駁得一次，好可能就有第二次、第三次，次次都用真力會影響身體健康。
娛樂圈有個現象好有趣：你愈紅，就愈多人鬧你唔值，這個情況你愈沉得住氣，又會愈多人話你勁。所以，有時被鬧不一定是壞事，反而可能是一種認證：證明你已經企到一個位置，足以令其他人不安。問題只是，你是否識得將這些妒火變成你的柴火，還是任由得它燒死自己。Tyson今次沒有選擇不斷追擊，結果反而是他贏了形象。正所謂「不招人妒是庸才」，有人妒忌你從來不可怕，最怕是你不知怎樣應對別人放下的「妒」火線。