Netflix泰劇《瘋狂獨角獸》(Mad Unicorn)不止是「好睇」咁簡單，而是好睇到你睇完會熱血沸騰、心思思想創業，甚至想試一試白手興家打贏商業巨擘。劇集改編自泰國「閃電快遞」創辦人李發順的真人真事，由納塔拉諾帕盧塔亞朋(Ice)飾演主角善迪，講述他如何由食老鼠果腹的山區少年，變成泰國第一間獨角獸公司的CEO。
成套劇由頭到尾都保持住一種「差啲永不超生、又死唔去」的緊張感。過程中雖然有奇蹟，但更多是韌力、堅毅同一種近乎宗教式的信念，靠硬撐一步一步爬上去。
短短7集，《瘋狂獨角獸》帶給觀眾的體驗不止緊湊，而是令人徹底代入——你睇著他被人蝦、被騙、被背叛，就會自然想幫他、想為他出頭，甚至想和他一樣變得更強。不僅是劇情引人入勝，而是情感上你會不知不覺深信自己同他同一陣線，甚至在他身上找到自己。最犀利的地方是，套劇真的拍到出「瘋狂」這兩個字。主角的癲，不是性格缺陷，而是戰鬥入面最大的武器——他根本沒得揀「正常」人生，唔癲唔得。整套劇完全演繹咗咩叫「如果唔係跪住過生活，就要癲住撐落去」。
問題來了：香港拍不拍到類似《瘋狂獨角獸》的劇集？
香港冇創業故事咩？一諗就知沒可能，大部分香港人都知李嘉誠如何由塑膠廠起家，打造出龐大商業帝國；唔使講太遠，過去幾十年由地產、金融、鐘錶、印刷，到賣台式飲品、搞app、開café，香港地怎樣會沒有素材。你說沒有演員、沒有平台？更加講不通。那麼問題是甚麼？答案是：香港創作人太怕現實，太忌諱赤裸。
《瘋狂獨角獸》拍得出一個毫無人脈的山區少年，從快遞業最底層一路死撐上去的那種血淋淋。但是在香港創業劇最多都是以名門商戰作包裝，完全沒有underdog過關打大佬的爽快感覺，沒有那一種搏殺的味道，就靠演員講兩句「我信自己得」收工。上年的《企業強人》就是最好例子，用順豐速遞做藍本，但策略味弱，危機靠講對白解決，感情戲仲多過物流戰。龔嘉欣不是演underdog嗎？豈料她是大富翁姜大衛的私生女，觀眾睇到呢度，仲點會有代入感。
相反，《瘋狂獨角獸》最犀利之處，就是它真心信觀眾會共情。你不一定似善迪般創業，但你一定試過被世界話你唔得，而你每一次都想證明自己不是垃圾。你會撐他，因為你都想知道——如果你夠癲，係咪都可以撐到最後一舖？它無疑是泰劇天花板，不止贏在人物立體、節奏爽快，而係它當你係一個識得痛、有想法，而且有力反擊的觀眾。
最重要是：它懂得尊重你。