不需要喜歡他
姜濤跌落海，而全香港則跌入了一個人性黑洞。
事發在6月24日下午，地點是西環副食品市場對開碼頭。當時有人見到一名男子墮海，隨即拋出救生圈讓他抱住，再由途經領航船救起。事後證實，墮海男子為姜濤。經理人「花姐」黃慧君話「小意外」，ViuTV製作部高層金廣誠話「冇事」，而姜濤自己亦在IG出限時動態貼出一張自己身穿紫色病人袍，舉起拇指的照片，話「大家不用擔心，明天見」，會照樣於翌日舉行的《呂濤米Lo Seoul》旅友旅途分享會亮相。
事件版本很多，有人話佢跑步頭暈，有人話佢飲酒加服止痛藥，有人話佢企起身時失足，亦有目擊者話佢當時坐喺欄杆外。版本太多，句句都似，又句句都唔似。唯一一致的是：未有定論，已經滿城審判，而最快下判詞的不是法官，而是以為《溏心風暴》一句「呢度唔係法庭，唔需要證據，我對眼就係證據」是金科玉律的香港人。
一半人想證明姜濤有問題，另一半人則用他開玩笑來製造話題。有人趁機話他跌落海同身形有關，亦有平台抽水叫姜濤粉絲「食返啲海鮮精神上陪伴偶像」，搞到要刪文並致歉，而每一句玩笑背後，其實都是冷血。
講到底是香港人對事物的信任破產，真假難分，習慣將犬儒當作理性，將嘲諷當作正義，將抽水當作眾人皆醉我獨醒。一個後生仔跌落海，第一時間竟然不是擔心他有否受傷，而是估他是否飲醉、是否自尋短見？
90年前，阮玲玉留低「人言可畏」四字後撒手人寰。30年前，梅艷芳面對病情謠言，亦在記者會講出了同一說話。今日，姜濤有驚無險，但一樣要被萬箭穿心。他說自己沒有事，大家反而更信他有事，更想知道他到底發生了甚麼事。
最吊詭的是，香港人日日講要關注精神健康，日日講要多點同理心，但當熒幕裡面的人呈現出稍為脆弱、稍為人性化一面時，反應永遠是「入得呢行你預咗㗎啦」、「食得鹹魚抵得渴」，然後又是一陣恥笑，例如王晶之前講的「人肥歌雞舞賤」。最終，一切情緒都要被娛樂化，一切人性都要讓位給八卦。
沒有人是完美，姜濤都一樣，他肯定不是唱得最好、跳得最勁、演得最掂，但有一班人鍾意他，就是覺得他有自己味道。你絕對有權利不認同他紅得如此緊要，但你不可以將這份不認同，轉化成侮辱。你可以不聽他的歌，不睇他的戲，不理他是否又再開騷，見親他就立即轉台，但你沒有需要將自己的不喜歡，變成仇恨。你不需要喜歡他，但請你放過他。