港產荷李活演員Jimmy O. Yang(歐陽萬成)最近來港開棟篤笑，加到三日5場仍然是一票難求，勁多本地藝人都爭住入場打卡，堪稱城中熱話。不過，有關這個一連5場的表演，網上最多討論的，竟然不是他的內容有幾好笑，而是「齋講英文唔講廣東話係咪唔夠誠意」，有不少人在Threads上面呻一句都聽不明，要扮笑，另一邊又有人寸他們：「買飛之前冇睇『English, seasoned with Cantonese』？」
一場騷有誠意與否，竟然係靠講幾多句廣東話去判斷？即係內容垃圾都沒有所謂，講得夠多廣東話，就自動升呢做有heart？孰是孰非，完全唔使審，更何況香港人在免費教育下基本學足9年英文，新一代甚至15年，話自己聽唔明，不是誠實，而是尷尬。
語言之外，最多人爭拗的，還有Jimmy到底算不算是香港人。
有人覺得，Jimmy香港出世，讀過華仁，之前住天后廟道，廣東話聽得明識得講，就算13歲移民美國，都肯定稱得上是香港人。有人覺得，Jimmy的父母是上海人，一家人離港多年，對今時今日的香港毫不了解，竟然不知道國際巨星成龍在自己老家的風評一般，在社交平台貼出兩人合照，話對方「My Hero」，實在離地。更有人進一步話，他今次開騷是包裝自己做「香港人」賣情懷，實情為開拓亞洲市場鋪路。
其實這類討論往往忽略了一點：身份認同從來不是他人賦予的標籤，而是個人內在的選擇。細睇Jimmy過往的演出，不難發現他對香港始終保有情感連結——《Guess How Much?》中有一段gag名為「Hong Kong Jimmy」，他亦曾公開表示最喜愛的電影是《國產凌凌漆》，今次回港更特地走入戲院觀看《破．地獄》。至於紅館演出尾段一句「Everything feels right in Hong Kong」，正是他對出生地的告白。外界怎樣定義他其實並不重要，他心裡早已有答案：這裡是他的出發點。
他是典型TCK(Third Culture Kid)，即第三文化小孩——在原生文化以外成長，永遠介乎屬於這裡和那裡之間。有人話他離地，有人話他不了解今日香港，但講真，他是否有資格講香港故事，不是網民去決定。他講移民美國初期著三角底褲被同學仔笑，講返香港時見到別人八達通餘額所體會的，明明廣東話不太流利，但照樣硬住頭皮去講，這些就是專屬他的香港經驗。
Jimmy的棟篤笑不止令人開懷大笑，不少觀眾(包括我)在尾段甚至感到意外的感動。他在紅館台上坦白講出回港尋根的原因，不煽情、不造作，反而見到一份真誠。如果你睇完依然覺得佢沒有誠意，認為佢係假裝親切、包裝情懷，只係想搵香港人錢——咁對唔住，這其實已經不是評論，而是誅心。誅心的討論，冇得拗，拗極都係浪費時間。
其實Jimmy從未聲稱自己代表香港人，只是希望在自己出生的地方舉行人生首場亞洲演出。而且香港本來就極少有像Jimmy這樣既識講廣東話，又明白國際stand-up語法，兼且在Netflix、HBO、Disney+都有代表作，還能夠在紅館爆滿開騷的棟篤笑表演者。難得有場好睇的騷，大家識笑，會感動，咪俾個like囉，唔係好難啫。