電影版占士寶雲同肥波。
占士寶雲本人同肥波。
作為貓奴，Facebook近來好自然俾上映中嘅《街角遇見貓》洗晒板，因為主角貓肥波(Bob)係2013年「英國榮譽動物獎」得主，全因佢幫助主人占士寶雲(James Bowen)戒毒有功，仲治愈咗一顆孤獨的心。
電影《街角遇見貓》由同名小說改編，小說作者就係書中主角占士。當年仍然係癮君子嘅佢，靠喺英國倫敦Covent Garden賣唱搵食，某日喺宿舍外遇見受傷嘅肥波，本來已經窮到燶嘅佢，諗住帶去醫院治療後就送佢走，點知肥波好有人性咁一路跟住佢，一人一貓從此一齊生活兼拍檔賣唱。
同名小說與《哈利波特》齊名
一早同家人斷絕來往嘅占士，因為肥波嘅陪伴而得到心靈慰藉，一人一貓嘅事跡傳遍英國，後來有出版商同占士協商，將佢哋嘅經歷寫成小說《遇見街貓Bob》，該小說全球銷售量已逾五百萬本，獲評為「青少年最佳十大選書」之一，知名度媲美《哈利波特》及《飢餓遊戲》系列，如今被改編成電影，早前預告一出，已在貓奴界瘋傳。電影版將由真肥波親自上陣，而主人占士則由《非凡生命歷》男星路克徹特維飾演。