蘇永康偷了甚麼？
最近有本雜誌的「獨家封面」真心精彩，他們稱收到讀者爆料，指蘇永康在黃埔海旁夜會「嫩版鄧麗欣」，一邊睇維港夜景一邊談心，掃背、十指緊扣都不特止，仲要啜奶——說的是一齊用飲管飲盒裝牛奶——寫得煞有介事，彷彿一場驚天地泣鬼神的婚變事件即場爆發。
結果隔了一陣，成篇報道全線下架，因為批相根本是11年前的舊貨。當年蘇永康仲未成為人夫，髮型、服裝跟他2014年做《環球小姐》表演嘉賓時一模一樣，連那款牛奶盒都退役了好耐。
傳媒炒冷飯不是新鮮事，但炒到舊相當新相，要全城集體坐時光機陪他們回到過去，就真是比較少見。最好笑是，該雜誌知衰後繼續扮冇事發生，照報蘇永康太太Anita的澄清回應，仲夠膽話自己的報道引起「全城熱話」。
只能夠慨嘆一句：「狗仔隊已死。」
以前，每本雜誌的狗仔隊都是娛樂圈最強武器，他們不止捕捉新聞，甚至能創造八卦神話。想影張栢芝、Twins、謝霆鋒就肯定影到，封面連環出，報攤即日售罄、加印再售罄是平常事。那時候的狗仔隊，就算踩過界、侵犯私隱，仍然讓人覺得：他們真係有料到。
但而家，八卦根本唔需要潛伏和追蹤。明星每日出post、開直播、打卡，「誤發IG限時動態」先係最新的頭條。以前要跟幾個禮拜先影到一格相；今日碌一碌電話，資訊多到難以消化。狗仔隊再影，只會慢幾拍，仲要冒住被告風險，不如收隊更實際。
今次舊相當新相事件，其實暴露了周刊雜誌的真正處境：記者早就脫離前線。紙媒式微導致經費縮水、人手減少，過去可以派幾隊人長駐中環、金鐘、蘭桂坊，日夜守候；現在好多時記者、編輯都要一腳踢兼顧採訪、攝影、剪片，偶爾收到「讀者提供」就當恩物。更何況，就算有資源，香港仲有幾多粒值得追蹤的明星？狗仔隊自自然然愈做愈沒有存在價值。
同時間，AI幾秒就整到兩個直男嘴對嘴的猛料，幾可亂真。這些假新聞、假片，往往比真實辛苦影返嚟的幾格相更易爆，更容易拎到點擊。至於是真是假，老實講，對好大部份觀眾嚟講早就唔重要，睇得開心先緊要。
狗仔隊的歷史任務，其實已經完結。最直接的跡象是沒有人手，最攞命的情況是沒有人值得影。蘇永康沒有偷食，偷的是狗仔隊最後尊嚴。舊時狗仔隊用快門搶新聞追真相，今日真相愈跑愈快，狗仔得四隻腳都追不到。
所以，這場烏龍，可以說是一場告別儀式：狗仔隊影到的最後一幕，是自己消失的樣子。