如何將香港小姐大改革

口裡說港姐很悶，心裡還是很留意。去年由一個人選出一個不太受歡迎的竹升妹，全城嬲爆；今年順應民意，選回一個樣子甜美身材高挑的本地薑，還是一個懂操作流利粵語粗口的本地護理系畢業生，大家立即熱烈歡呼。本小利大，香港人真係好易氹。

貼地，在今日，太緊要。在中大港大出來的，受歡迎過來自加拿大。之前，港姐打算拉隊前往西貢拍攝外景，新界西貢，不是越南西貢，被嘲笑格調太低，連方太也怒罵一句「有冇搞錯」。我力排眾議。當台慶大事也極有可能變成網購節目，整間電視台的發展方針就是用盡每一個節目每一寸空間來推銷。港姐去歐洲有甚麼用呢？意大利和法國名牌又沒有落廣告。最後落實去澳門才合理，可以叫埋代言人蕭正楠帶隊買手信，途經珠寶店也順理成章。你總不可能在香榭麗舍大道找到間六福。

我嫌個節目賣得未夠盡呀！例如，點解要選完之後，才叫冠亞季軍坐在一桶桶炸雞面前接受訪問？食炸雞本身就是一項比賽一項表演啦。做港姐唔使有儀態呀？如何食炸雞而不失優雅，難度高過拉小提琴。又例如，司儀向佳麗發問問題，問Do姐、汪阿姐同埋家燕姐齊齊選美，選哪一位做冠軍。有甚麼效益？家燕姐個演唱會又不會給予廣告費用。要問，應該問，如果得KFC、老麥同Pizza Hut畀你揀，你會揀叫甚麼外賣。如果個佳麗腦筋靈活，懂得答炸雞，立即加分；背得出鄭嘉穎個電話號碼，唔使講嘢直入五強。咁先係今時今日的做生意態度。

佳麗都開心啲啦。你家陣要剛剛落選的，不忿都未不忿完，就要立即出返舞台跳舞娛賓襯托勝利者，唔黑面都唔係人啦！你可以叫剛剛落選的，照樣再上台，不過不用開開心心跳舞，改為執行不同家務，例如吸塵，例如熨衫，觀眾如果對吸塵機或者熨斗有興趣，可以立即利用手機應用程式入貨，負責示範的落選佳麗，有佣收，輸了都有番個安慰獎，即使未必開開心心笑得出，至少不會黑面黑到似想開槍殺死班評判。試想像一下，得獎者身穿高貴晚裝現身之前，落選者像肥媽一樣利用高科技煮食工具煮鮑魚？係咪有娛樂性過要她們勉強跳一段永遠不會整齊的舞？

做觀眾的，少點批評，快點接受現實。現實是以前有四大天王，現在是蕭正楠加曹永廉。現實是以前的對面台還會出到楊恭如，現在只有一個不該叫Oscar的Oscar。我們常說年年港姐也一模一樣，好鬼悶，到電視台真的下決心將港姐改頭換面，改到比工展小姐更似工展小姐的話，我們又能否接受？1998年，Jim Carrey的《真人騷》(The Truman Show)，真是一齣神作。