MIRROR三不思議事件
姜濤自爆仲有三年合約後，鏡仔幾乎每次出席活動被記者追問。最近姜濤等人回應時，似乎幾滿意同公司嘅關係，但我又見到有粉絲反對佢哋同公司續約。令我諗起有行內人呻過，經理人公司同藝人係一個極不平等嘅關係︰「成功一定係藝人好，瀨嘢一定係公司衰」。以下幾件不可思議事件，可能好主觀，但值得思考。
MIRROR今年首場fan meet，網上一片粉絲同偶像互動片段，原來場見面會搞到凌晨兩點幾，偶像粉絲都話為愛捱夜，工作人員就真係辛苦。平時紅館演唱會超時罰錢已喊咁口，紅館尚且係政府場地，今次見面會喺會展，超時場租同加班錢應該仲襟計，唔係話公司靠fan meet吸血咩？點解似係公司出血多啲，此為一不可思議。
有姜糖得悉三年約事件後，穿鑿附會話唔怪得姜濤新歌冇咩宣傳，懷疑公司有心收埋佢。其實藝人宣傳多少要睇檔期等好多因素，當然雪藏即將約滿藝人的確係唔少公司嘅手法，但姜濤繼續出緊歌、出緊騷、年底仲話有個人演唱會，咁都被人覺得係收埋個藝人，此為二不可思議。
陳卓賢自爆合約唔只剩三年，因為入行時係另一間經理人公司，而家公司「贖」佢返嚟時已經出道一段時間，所以合約到期日同其他鏡仔唔同。當年陳卓賢雖然未有而家咁紅，但已係MIRROR嘅成員之一，唔排除前公司都會「吊高來賣」。唔係話ViuTV好孤寒嘅咩？加上當年陳卓賢有唔少緋聞纏身，幫佢「贖身」可謂高風險投資，此為不可思議之三。
以上三件事之所以不可思議，因為有違大家固有印象，但會唔會係個印象只係一啲妖魔化嘅想像，事實或者只係「大家玩得盡興，加錢都冇所謂啦」、「個仔唔得閒宣傳唔好夾硬來，等佢多啲休息啦」、「如果可以令佢開心返，專心做音樂，贖身費貴啲都俾啦」。
公司同藝人從來都係榮辱與共，但haters gonna hate，大家只會主觀地批評。