MIRROR演唱會嘅細細位

MIRROR演唱會開鑼，晚晚唔同彩蛋等派彩，其實本身個rundown已有好多位值得細味︰

1. 個台簡單，無咩機關，仲有工作人員不時清走表演留下嘅紙屑，安全為重。但有好多視覺效果，動畫、燈光、仲有煙火，入來追偶像嘅「前夫」們都唔會悶。

2. 今次16演唱會橫跨20日，隔幾晚就有假放，而且聽講今次係「零後台影相政策」，一來係流感勁，二來想班仔每晚一完騷就返屋企休息。唔易做㗎，好多大明星、贊助商、姨媽姑姐覺得後台影相先係重點，唔俾影相，鬧爆主辦，佢哋要頂㗎。

3. 開show片段逐個仔出場，唔再係最多fans嗰一兩個放最後(其實好合理嘅，愈多fans叫聲愈大)今次係副隊長AK打頭陣，隊長壓軸。公司啲人同我講，呢個係以團行先嘅表現，係「我哋大過我」嘅實踐。

4. Stanely副body成為熱話之一，我就欣賞佢揀咗唱《來不及》。聽講佢一直想專心做演員，但媽媽舊年過身，公司幫佢了件心事，唔理首歌成績、攞唔攞獎，純粹做首歌唱俾媽咪聽。喺演唱會唱完，佢對個天飛吻咗一下。

5. 成個騷幾乎無講嘢，到encore位先由隊長多謝唔同單位，佢亦講得好白：「我哋唔會成日出來講嘢，我哋會一直唱一直跳，只要有你哋喺到，我哋咩都唔講都會講呢句　『大家好，我哋係……』」跟住全場嗌MIRROR，我聽到毛管戙。

6. Encore出場前，先會影唔同粉絲嘅燈牌，之後會影MIRROR燈牌，fans亦會由嗌自己本命到嗌「MIRROR」。唔少鏡粉都話好感動，喜歡本命同時愛團真係得，亦係對佢12個最好嘅。

今次演唱會，12個人再一次喺台上，大家睇到好多，睇唔到嘅更多。呢一年半佢哋嘅經歷，大家都明，今次演唱會，對MIRROR意義有幾大。雖然有人批評阿邊個出來咁多，邊個又得咁少；亦有人話仲有飛賣，冇炒到之前咁勁。批評、黑粉一定有，但更值得睇嘅，係12子嘅fans club自發約埋合照，好似係成軍5年來第一次，我見到MIRROR同佢嘅fans一齊進步，亦一齊實踐緊「我同我哋」。