Slash族(身兼多職)近年成為愈來愈多年輕人追求的生活狀態，雖然無咩公司會認同員工秘撈，但今時今日已經無幾多人只打死一份工，公司也只能隻眼開隻眼閉，乘務員界都一樣，可能更盛行。飛咗咁耐，聽過的工種包羅萬有，有的真係估都估唔到。
一般打工仔放假秘撈可能幫小朋友補下習，接下job做design，而我哋放假時間比較彈性，可能一個月不規律地都有8至9日，雖則沒有固定假期，但這些日子也可有應付不同兼職的可能。好多人知最多空姐會做代購、model同KOL，但原來酒保、咖啡師、健身教練、uber司機同sales……都係唔少同事的分身之一。也有同事會利用閒暇學手藝，例如植眼睫毛、化妝、美容、陶藝，但上堂地點就好國際化：澳洲考咖啡牌、柬國學瑜伽、泰國學拉筋、日本學潛水……為失業及退休作好準備。
上述職業都算大路，可能都難打破唔少人對空姐的幻想，但航空界真的臥虎藏龍，看似嬌柔的空姐，隨時嚇你一跳。記得有次飛長途，一位身形嬌小的女同事手臂很健碩，我問是否常做運動，她靦腆一笑，說自己做空姐之前做廚師，每日要揸很重的鑊鏟，但因為家人覺得太無女人味，便勸說轉行。我問有無後悔離開，她表示自己很愛整嘢食，拎住砂煲罌罉就好有滿足感。但因唔想同家人關係變差，所以決定順其意，但就無放棄過對烹飪的熱誠。我八卦追問有無做兼職，佢笑笑口，再度露出強而有力的臂彎，「一陣去燒味舖斬叉燒呀！」
肥、毒、宅的空中服務員。