國泰邀星級名廚推輕盈飛機餐

健康飲食是大勢所趨。國泰航空(CX)推出新「飛機餐」，由推崇低脂、低碳水化合物飲食哲學嘅星級名廚Daniel Green設計餐單，聽聞Daniel試過轉咗輕盈飲食而減咗65磅。CX為新「飛機餐」噚日搞咗分享會。 菜單包括三款沙律同五款主菜，Daniel同Ray講佢最鍾意「泰式紅咖喱鮮蔬伴烤南瓜」同「蟹肉芒果沙律配芥末醋汁」，泰式咖喱用咗椰奶取代忌廉烹調，脂肪減低咗，但又唔影響味道；而蟹肉芒果沙律口感清新舒暢，絕對係身處3萬呎高空中嘅首選。 飲品方面亦有心思，其中新推的「薑味橙汁」可預防咳嗽感冒。有少少咳嘅Ray試過，原來橙嘅酸味同薑味係咁夾！新菜式下個月起，開始供應俾香港去北美航線嘅頭等同商務旅客，Ray真係要考慮加錢升級座位啦！

Ray~投身傳媒工作多年，由市場研究做起，一直與公關、廣告、新聞界結下不解緣，心境永遠青春。