呢個問題齋聽都覺得煎熬！到底係咩驅使一個人主動分手後仍然要求保持朋友關係？感情真係咁好就唔會選擇分手。假若當初是迫於無奈分手，分開後又何必堅持做回朋友呢？心裡尚有愛的話自然會為對方著想，所以很大可能不是出於愛，而是出於習慣和自私。
分手後同前度聯絡同入九龍城食泰式生蝦感受非常類似 —— 心想一場嚟到九龍城不吃罷不吃，明知食完會口臭都不顧一切、大塊大塊蒜片拍入口。大快朵頤完個口如期臭足幾日，刷牙都無補於事，於是你又開始後悔，甚至連跟朋友開口嘅勇氣都冇。然而耐冇食一排，提起惹味十足嘅生蝦，你又開始想念那種又酸又甜嘅感覺。
再見亦是朋友，但前提是大家要先放下。無數情侶分手後仍能做回朋友，秘訣是先不要聯絡。會提出這個問題代表你還未放低，因此暫停聯絡是上策。假如工作需要就保持有限度嘅接觸，點到即止地只談公事不談私事。讓傷口慢慢癒合，等到有一日你就算舊地重遊、看見舊照片或聞到同款香水味，心再沒有出現要撕裂的感覺時，再想有沒有聯絡的必要吧。
一個人最基本嘅責任就係照顧好自己。曾經因為佢，你傷心到魂不附體，連自尊都不要了。既然知道自己會再被前度突如其來嘅問候打亂情緒，和他暫時斷絕來往，是你能夠為自己做的最基本的事。
