又到十二月，期待咗全年嘅聖誕節終於到來！今年斯德哥爾摩嘅聖誕氣氛來得早，亦比往年更加強烈，似乎大家都需要點聖誕嘅歡樂氣氛為自己同所愛打打氣。今期一於同大家介紹幾款經典瑞典聖誕飲品，等大家喺地球嘅另一端都能夠感受一下北歐嘅聖誕氣氛。
•聖誕可樂(瑞典語：Julmust)—喺瑞典語中，Jul有聖誕嘅意思，Must嘅意思則類似係汁、精華咁解。Julmust係一種類似可樂嘅飲品，但比可樂更濃一點，味道有少少似「沙士」汽水。對瑞典人嚟講，Julmust代表住童年聖誕節嘅幸福味道。
•熱葡萄酒(瑞典語：Glögg)—Glögg係一種加入咗肉桂、丁香等等香料嘅葡萄(酒)熱飲，飲嘅時候通常會加入埋去皮杏仁同提子乾。含酒精同不含酒精嘅Glögg都有，而且佢甜甜地，又有啲嘢𡁻下咁，仲好暖胃𠻹，係男女老幼嘅聖誕派對恩物。
•聖誕啤酒(瑞典語：Julöl)—Julöl苦中帶甜，味道非常濃郁，係鐵漢嘅味道！如果本身鍾意啤酒味嘅人應該會覺得不錯，但個人就覺得Julöl飲落有陣莫名其妙嘅耳屎味。
•生命之水烈酒(瑞典語：Akvavit)—Akvavit係一種伏特加底嘅酒，酒精濃度達40%，一般以小茴香、孜然、蒔蘿等作為基本香料。唔止聖誕，基本上各個節日瑞典人嘅餐桌上都少不了Akvavit。“Akvavit”字面上本身就有生命之水嘅意思，俗啲講，直情係瑞典人嘅命根！
以上幾款飲品喺香港都唔難買到，而且含酒精同不含酒精嘅都有，任君選擇，有興趣不妨試試。
*提提你，未成年人士切勿飲酒，成年人士開車前亦千祈咪飲呀。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐 ig ：sis3ter