唔好話May姐唔夠堅毅，佢真係屢敗屢戰。執筆呢一刻，佢仲響度推動最新版本之退出歐盟方案。只要國會同意，佢話會有公投多一鋪，等公眾可以選擇云云。老老實實，呢個新版本，有人話同舊版之方案精神都係差唔多，仲要好接近好接近關稅聯盟，即係有脫等於冇脫，咁就真係頭痕也。唔覺唔覺，May姐又陪伴了大家快三年，任期唔長唔短。但係，任內有乜建樹呢？
呢個好多人話係民主政治之弊處。當所有人都要面對政治壓力之時，政府成副精力都放晒響政治議題，民生放兩旁。但問題係，好多人刻意將政治同民生對立起來，認為民生可以脫離政治，傻啦。英帝脫歐一事話你知，如果政治議題一直唔可以settle，最終都會影響經濟發展。美帝之政治問題，就係打沉北方強國。侵侵依家打北方強國，就當係生死戰咁樣打，因為只要打贏北方強國，多一樣政績連任。
不過，千祈唔好以為，侵侵之連任，只係同貿易戰掛鈎。響美帝媒體角度，侵侵仲係響本土政治方面，畀民主黨追殺之中，例如通俄門事件呀，干擾米勒對侵侵之調查等等，連伊朗之鬥爭，版面仲多過貿易戰。坦白講，響美帝心目中，有乜嘢比本土政治更重要呢？
好多從政之商家佬，同唔從政之商家佬，有好多政治上之認知差距。唔從政之商家佬，總覺得政客都係市儈兼睇錢份上，商家佬磅水的話，代議士即跪。但從政之商家佬，睇政治唔係單純地認為，政客只係睇錢，佢地自己都有一套理想，都有啲嘢想做，都有個人意識形態之考慮。外界睇錯侵侵，以為侵侵真係一個誤入叢林之傻商人，沒有意識形態眼裡只係$$$。依家大家如夢初醒，先至知道佢係一個大右派，仲要係走民粹路線的大右派。依家知道已經太遲，因為佢嘅決策，影響千千萬萬個大小資本家。
冇理想，不會從政。但係，響香江，用呢個方法思考本地政治就死得人多。有政界人士同我講，講開「送中」條例，佢地出席商家佬聚會之中，個個中小商人，炒蝦拆蟹。政界朋友都好醒嘅，唔好畀外界批評佢地從政者老作選民意願，於是佢地又出問卷問清楚中小商人之睇法，嘩！收番之問卷，個個都剔支持政府！問係怕未？
點解會咁？因為香江之政客，好多唔係真係好有理想，只係做議員可以威一威。咁樣北方大老細又畀錢又幫手出選，何樂而不為？有啲當係打份工，唔係咁有一套理想要從政，要改善社會。心態決定狀態，既然呢班議員都無心戀戰，支持「送中」又何妨？反正搵夠錢，搵個機會移民鬆人也。咁下個月法例二讀又會唔會有奇蹟發生，商家佬議員集體起義反對「送中」條例？哈哈，你話呢？
