仲記得兩個月前《人中之龍7》叫好叫座，逆轉晒上市前所有負評，土下座都真心覺得係game界佳話，因此抱住唔帶任何偏見嘅情況下，都一試剛剛推出嘅手機遊戲《人中之龍Online》。點解咁講？因為早響日文版推出時，呢隻game已經有唔少朋友玩過，全部都係俾負評，不過，當時有好大原因係因為主角唔係桐生一馬，所以既然而家都接受到(仲幾鍾意)春日一番，自然可以有少少期待。點知玩完發現啲負評同春日都冇太大關係，手機版劇情其實係用返《人中之龍7》，但又有少少唔同，個人覺得有可能呢個劇本先係最初版，反正春日入獄嘅原因，同佢出獄後嘅發展確實同《人龍7》有好大出入，要當佢係平行時空先得。講返遊戲，最大問題係玩法實在太悶，戰鬥介面純粹用角色卡嘅畫面交代，但角色卡嘅美術又唔統一到令人好難投入，一時係3D，一時係2D，美術亦唔係特別靚，加上劇情實在比唔上原作，似乎都好難期待會成手遊大熱作品之一。