記得初嚟到瑞典，成日見到啲瑞典人用手指撩入自己個嘴，以為佢哋不拘小節到會周街撩牙。後來先知原來佢哋係食緊口含煙！
瑞典口含煙（瑞典語：Snus），雖然中文譯名用到煙草嘅「煙」字，亦同傳統捲煙一樣含有尼古丁成分，但使用嘅過程並無煙產生。口含煙其實更加似一個個包咗煙草同香料嘅迷你咕𠱸。每片口含煙大概有一隻成人腳趾公指甲咁大。使用者通常會將口含煙用手指塞喺上唇同牙齦之間，「食完」就會將嗰片口含煙吐返落煙盒底層進行收集。
喺瑞典，食口含煙嘅人比吸食傳統捲煙嘅人要多。關於口含煙定傳統捲煙對健康嘅禍害比較大，仍然係眾說紛紜。不過口含煙並唔會產生二手煙影響他人，又可以靜雞雞咁食，所以亦較為社會大眾所接受。加上瑞典有新法例，禁止任何人喺餐廳、車站、公共建築入口等大部分公眾地方食煙，包括傳統捲煙同電子煙。如此一來，轉食口含煙嘅人就比之前更多。
當年剛嚟到瑞典，我都貪玩試過食一次㗎。將煙片放入上唇後一陣，我就感覺暈暈地，少少心跳加速，個人並唔覺得特別愉悅。而且食完又要搵地方𦧲，非常麻煩。我仲好清楚記得當年試嘅係甘草口味，食完之後陣甘草味喺個口度全日都揮之不去，令到成件事更加唔討好。嗰次係我第一次亦係最後一次食口含煙，自始每次聞到人食都會想嘔。
無論係口含煙定傳統捲煙，同樣有害健康，大家千祈咪亂試！