八、九十年代全亞洲都非常受到少年漫畫影響，當中又以《少年JUMP》嘅作品最影響深遠，大到今時今日依然仲有影響力，最佳例子莫過於《龍珠》，就算不斷咁戰鬥戰鬥，甚至用舊角翻新再做劇場版都一樣大賣，因此好多商人都睇準呢啲八、九十年代漫畫IP改編遊戲，今次土下座想講嘅就係手機遊戲《聖鬥士星矢：覺醒》，皆因佢真係做到一個改編遊戲標準。講真，呢類手遊game最早做嘅其實係日本game廠，始於版權易傾，但往往成品都非常失敗，反而成功嘅例子多數都係由大陸開發，如之前都提過嘅《格鬥天王M》就係一例。今次呢隻《星矢》亦唔例外，唔只遊戲有質素，亦好準確咁還原到原著精髓，特別將原著劇情搬返落遊戲就最值得一讚，可以俾啲00後(甚至10後)小朋友感受返原著魅力之餘，唔使睇過原著都對角色有感覺。至於老人家如土下座，淨係聽到角色聲優全部明星級已經大讚，呢啲錢真係抵俾佢哋賺！