PS4獨佔大作一年有唔少，但由Sony Interactive Entertainment(SIE)自家出品嘅數量就唔會得別多，而且多數SIE自家出品嘅嘢，水準都有一定保證，就好似《God of War》同《Marvel’s Spider Man》等，而近期就有《Days Gone》呢隻由2016年E3發布時，就一鳴驚人嘅大大作。不過，遊戲推出後，土下座發現好多人都響網上表示「垃圾」同「中伏」，去到自己入game一試就更加疑惑，畫面係唔算超班就絕對係一線，玩法唔係新鮮但世界觀完整，系統亦冇好大粗疏，bug反而都遇過一次，但點都好，未去到「垃圾」咁離譜，後來睇更多玩家感想，原來係同遊戲期待值有誤差，話說當初遊戲主力sell「喪屍暴走」，同一畫面100隻喪屍追殺你，再要你邊走邊大開殺戒，的確係會有以為係《Left 4 Dead》之類遊戲嘅錯覺，但實際上，《Days Gone》係一隻非常現實又灰暗嘅末日生存遊戲，而且主線冇太多劇情，要你好投入響個世界入面先會感受到主角嘅情緒，所以想大開殺戒嘅朋友，買game前三思啦！