支持位

領袖民望一直無法提振，依家佢嘅支持率，終於跌破咗30%之心理關口。個裂口一開，相信會一浪低過一浪，直至貼近董建華腳痛時之民望，即係約22%至23%左右，到時候，唔走都冇用，政府運作停擺。

點解佢無法響去年11月，響個逆轉位一直反彈上去呢？有與Hello Kitty領袖fans之老友，一直響我耳邊講，社會上依然有唔少人，仍然唔願意同Hello Kitty領袖合作，一直拖佢後腿，寧願社會停擺，唔肯齊心向前行，都要死拗唔合作。

我同佢講，佢都唔係第一日玩政治。如果佢以為香港人人一定會齊心一意，支持特首有效施政的話，一係香港人齊心講大話玩佢，一係香港已經成為一個極權國家，個個都要公開表態誓死效忠。響Hello Kitty領袖上任之時，佢都預咗會四面楚歌啦，無理由佢蠢到以為全世界都會團結一致，緊密圍繞著以佢為核心之施政團隊。

既然佢有能力，忍咗十幾二十年來謀住領袖呢個位置，佢都知道，要突破圍城困局，一定要廣交朋友，分而化之，以最細膩及綿密嘅手法，逐漸將大部分人爭取過來。即使不是盟友，也把反對聲音neutralise佢，而最上上之策，就係爭取佢哋過來。

點樣爭取？政府最大之武器，就係政治分餅，特別係將公職，好似分餅咁樣分出去。只要分得好，就可以將原本之「敵人」，變成朋友。陳水扁上任嗰陣，一樣係弱勢，最大嘅隱憂係軍隊同國安，一直都係由藍營壟斷，真係針插不入，而且更怕出現軍隊政變。

阿扁叻在有心腹同埋國安之綠營重量級人士，利用好多明升暗降、經濟誘因、威迫利誘等方式，將系統由純藍色，變成綠綠哋，最後又將成個系統綠化。而Hello Kitty領袖呢？最重要之公職，直情粗枝大葉，好似滾水淥腳咁樣益晒自己人，將一些次幾等嘅畀所謂「唐營」，泛民連影都冇幾個，是是但但搵三、兩個已經建制到滿瀉嘅溫和派凑數。

問題係，點解唔去廣交朋友，盡量將委任人士之團結面擴大呢？好似有個前泛民溫和派之區議員，響違紀申請副局長職位，同泛民分手之後，出席過撐國教行動，文章愈來愈建制之後，不久，Hello Kitty領袖之團隊旋即委任佢去市建局。當然，佢哋可能認為呢位人士，可以成為一個「棄暗投明」之榜樣，畀泛民睇，只要有人政治覺醒，願意親Hello Kitty領袖之路線，就會委以重任。

但係，咁樣操作，不單止「棄暗投明」得好核突，而且政治斧鑿太深，好明顯係要show畀溫和派睇：「嗱！棄暗投明呀！即刻有獎攞！你哋仲唔快啲埋堆？」結果呢？溫和民主派個個嚇到眼突，連願意溝通之溫和泛民依家都唔想同政府合作，你話係未捉蟲？

政治手法唔夠細膩，操作粗枝大葉，又點可以廣交朋友？更何況建立盟友關係？冇朋友，民望又點會回升？

Hello Kitty領袖之支持者，咪又歸咎於港英餘孽同埋外部勢力？除咗呢兩個，仲有乜嘢新意？政治操作拙劣，算唔算數？(二之二)