大茶飯

部分青年係好灰心。事實的確如此。當你有些少理想，例如想做start up，申請任何基金，點都會申請唔到，點解人地紅芯可以滾動到幾多輪資金，自己一毫子都冇。青年想為理想去衝，點知香江行頭窄，想搞呢樣嗰樣都敵唔過租金同飯盒：係呀，中環食個飯盒都要六十幾銀，點算？至於你想從政，仲弊，有些少理想就會畀上面DQ，即係呢個社會啲高層已經同青年講：唔好搞啦，乖乖地跟大隊，做人腳踏實地，咁咪好囉？

但係青年未必知道，其實佢地做緊好多挑戰政權之東西，已經有人響花園道暗自紀錄了一切，放響一大堆檔案裡面，適當的時候就會拿出來用。香江問題，素來都係美英雙帝用來搞北方大國之議題，已經有近百年歷史了。美英雙帝點會唔好好咁利用香江來做嘢呢？

不過呢，世界都有世界秩序，外交有外交之操作。正常咁睇，一個國家唔會貿貿然去干預別國內政。講到呢度，你梗係會鬧我黐線，美英雙帝唔係周不時去搞別國內政咩？當然，美英雙帝干預別國內政之傳統都有百幾年，但要搞之時，佢地都係文明人，都要有理由、有借口、有罪證，等佢地出師有名。要做到咁樣，就一定要手上要有罪證，而呢啲罪證呢，例如係違反國際人道主義，又或者唔係罪行，而係有自然災害時有國家基本上無法處理，咁佢地就會製造出一個國際社會危機，咁就因為有國際社會危機，美英雙帝自然要介入啦，係未？

近十幾年，即使雨傘前後，北方大國真係成功做咗一樣嘢，就係將香港事務去國際化，將香江事務隱沒咗響國際聲音當中。即使係雨傘後，有一段時候北方大國以為會有美英雙帝借此插手香江事務，結果都係冇位入。美英雙帝之難入位，主要係雨傘後，香江經濟冇惡化出事，社會又好快穩定番，嗰啲領袖到依家都未展開聆訊。呢招好高，因為未審，等社會穩定咗一排，即使下次開庭，社會嗰種激情已經冇晒，仲邊有可能會搞到社會立立亂呢？

但係，近一兩年，美帝侵侵上台之後，似乎都有啲變化。之前講過，美帝之《香港政策法》係一個好好用之武器，用來對付在香江搵食之北方企業。問題係，美帝都唔可以貿貿然去批評香江，話香江呢樣唔好嗰樣唔好，然後響下年度借《香港政策法》玩嘢。咁花園道之職責，就梗係要儲存罪證，好似儲分咁樣。要儲分的話，最醒目之做法，就係默不作聲，唔聲唔聲，交朋結友，飲茶灌水，靜靜收集，下年就交畀美帝國務院。

依家花園道就儲緊罪證積分卡，所以我成日提醒朋友，唔好以為鬧美帝冇事，打壓自由當食生菜，有後果㗎，到時美帝出手，唔好話我冇提醒過。