疫情下的日本回憶新潟名物炸豬扒

第四波疫情來勢洶洶，政府搞咁耐都搞唔掂個疫情，旅遊氣泡率先爆破，究竟幾時先可以再飛？我最愛嘅日本去唔到，唯有拎起手機回顧一下J住啲舊相先，赫然發現遺留漏了新潟名物炸豬扒，同大家分享一下。
話說今年二月日本開始有疫情時，我喺有雪國之稱的日本新潟滑雪，一如以往每次都會抽時間去新潟市玩，慣常會訂高級壽司店例如「鮨奈可久星野」或「鮨弁慶海」，順道去見下「今代司酒造」兩位朋友，一切都因為疫情關係統統告吹，食買玩變成新潟市掃口罩一日遊(當時香港口罩短缺)。由新潟站一直徒步走到古町通，幾乎走勻大大小小藥妝店&便利店，口罩就冇乜，得到只有酸痠軟嘅雙腿兼飢寒交逼。想起新潟名物炸豬扒發祥店「とんかつ太郎」在附近，正當興高采烈走到店前......閉店，灰到一個點。

天已黑肚已餓，唯有折返車站附近覓食，見到又有間七十一，照樣入去買口罩，OMG防疫產品齊晒貨仲要冇限購，爆買完，發現有間「とんかつ政ちゃん」，就隨遇而安入咗呢間。一樣係食炸豬扒，仲有下酒菜，全日文menu，不過唔使怕，跟住個季節性menu叫就得，螢光魷魚、白子、燒物&揚物全部有齊，碟碟幾百円有交易，加埋名物炸豬扒，又平又抵食，呷啖啤酒，之前嘅失意通通忘記晒，人生就係咁得意。所以呢，香港人唔好灰心，柳暗花明又一村（雖然我係買唔起又一村）。